DEN HAAG – Aruba, Kòrsou i Sint Maarten por lo pronto lo no haña e posibilidat pa apelá serka un wes independiente ora nan no ta di akuerdo ku desishon for di Den Haag.
Gabinete hulandes ta posponé e plan pa un asina yamá akuerdo di disputa atrobe. Sekretario di estado Raymond Knops ta laga sa ku tin otro prioridat, manera rekonstrukshon di Sint Maarten.
Sekretario di estado Raymond Knops (Relashonnan den Reino)
E tres islanan tin na propio parlamento i gobièrnu pero Konseho di minister di Reino por duna nan un òrdu tokante nan maneho. Ministernan hulandes por fòrsa e islanan pa por ehèmpel adaptá nan presupuesto òf organisá elekshon.
E islanan mas bia no ta di akuerdo tokante ki ora Den Haag por intervení. Un komishon spesial di disputa mester para esaki.
Binti aña ta warda
Último añanan e islanan outónomo a haña pleitu ku Den Haag por ehèmpel tokante finansanan di gobièrnu i skrinen di kandidato pa puesto di minister. Na 2014 e èks promé minister arubano a bai den wèlga di hamber despues ku Konseho di minister di Reino a disidí ku Aruba no por a aprobá su presupuesto.
Konseho di Estado ke pa gabinete hulandes hasi lihé ku un akuerdo di disputa asina. E Konseho ta mira ku e relashonnan entre Hulanda i e islanan no a mehora. “Kada bia tin disputa ku ta pone deliberashonnan pega”, tin pará den e relato anual di 2017.
Konseho di Estado
