DEN HAAG – Parse ku e seguridat di informashon di gobièrnu den e munisipionan ekstraordinario Boneiru, Saba i Sint Eustatius a kore riesgo pasobra e sistema di log in i e software no tabata bon.
Ta trata aki di e seguridat di e ret di IT na Rijksdienst Caribisch Nederland. Kontraloria General, ku ta supervisá gobièrnu, ta yama e resultadonan ‘serio’ i na aprel a bati alarma loke a pone ku ministerio di Asuntunan Interior i Relashonnan den Reino ta tuma medida.
Si e informashon tokante siudadano i amtenar e último añanan na e islanan a kore riesgo, i kuantu, e ministerio no ke bisa ‘pa motibu di seguridat’.
E problemanan rònt di seguridat t’ei for di 2014. E riesgonan a oumentá, pasobra por a usa aparato privá – manera smartphone i tablet – pa login riba e ret di gobièrnu.
Ku e lèk den seguridat hende ku mal intenshon via e munisipionan karibense lo por a haña akseso na e sistemanan di ret di Hulanda Oropeo.
Riesgo urgente
Segun gabinete hulandes a ‘reakshoná mésora’ despues di e opheshon di Kontraloria General tokante e seguridat di informashon. “Riba e riesgonan di mas urgente a tuma medida mésora”, segun e minister responsabel Kajsa Ollongren (Asuntunan Interior i Relashonnan den Reino.
“Simplemente bisá, awor a pèrkurá ku ménos fásil por hasi un konekshon entre e retnan di Hulanda Karibense i e retnan di Hulanda Oropeo., asina ku un hende sin outorisashon no por djis wak den tur kos.
Tambe uso di smartphone, tablet i computer propio entre tantu no ta pèrmití mas. Si esaki sosodé tòg, ta posibel solamente ku un di dos verifikashon ku un ‘token’ spesial.
Medidanan ainda no ta sufisienteKu e plan di mehorashon Kontraloria General a disidí di kanselá e opheshon. Pero e medidanan no ta sufisiente: e ministerio ta rekonosé ku e seguridat di e informashon ainda no ta sufisiente. “No por realisá tur medida di awe pa mayan”, e ministerio ta laga sa. Pero lo realisá nan ku urgensia i persistensia. Tur hende ta sinti e nesesidat ei.” Un opheshon ta un di e medidanan di mas pisá ku Kontraloria General por imponé riba un ministerio. Esaki ta sosodé solamente den kaso di erornan serio òf situashonnan alarmante |
