WILLEMSTAD – “Si bo papia bon di e gobièrnu venezolano, nan ta kastigá bo, anto si bo papia malu dje gobièrnu, nan ta kastigá bo pió”, asina un venezolano bibá na Kòrsou di forma anónimo a duna di konosé durante e votamentu pa un presidente nobo na Venezuela.
Apesar di ta residensiá na Kòrsou e tin miedu di papia, pasó na momento ku e yega Venezuela, e ta teme ku ta tuma represaya kontra dje.
E pueblo venezolano por a bai urna pa elegí e Presidente di nan pais. Diferente venezolano bibá na Kòrsou kier mira un kambio den e aktual gobièrnu venezolano. Algun ta indiká ku e situashon sosio ekonómiko dia pa dia ta sigui bai atras na Venezuela. Hendenan ta forma filanan largu for di den oranan di mardugá pa por kumpra produktonan di promé nesesidat, pa te den oranan di atardi bisa nan ku e trùk di entrega lo yega te su siguiente dia.
Vota pa un kambio
Siudadanonan na Venezuela ta pasando den hopi angustia. Nan ta splika ku ántes tabatin pobresa den e pais, pero aktualmente e hendenan ta bibando den miseria. No tin kuminda mas den e pais, motibu pa kual nan ta spera ku e pueblo venezolano lo sa di vota pa un kambio.
Otro siudadano venezolano ta splika ku e pueblo ta muriendo di hamber. Un kilo di karni ta kostando 2000 i piku Bolivar, siendo ku un obrero ta gana 400 Bolivar, miéntras ku un trahadó di PdVSA ta gana un sueldo mínimo di 800 Bolivar pa luna. “Ta algu apsurdo ku un hende mester traha algun luna pa por kumpra un kilo di karni. Preisnan den e pais ta oumentá di mainta pa atardi. Pa kolmo no tin produktonan di alimentashon, pues e situashon ta birando aun mas pió na Venezuela.”
Secrecia votamentu
Venezolanonan ku ta di forma legal i a registrá nan mes na e konsulado venezolano por a bai vota. Por a nota ku e asistensia na e urna den Scharloo durante oranan di mainta tabata hopi abou. E personal na urna no kier a duna niun deklarashon enkuento e kantidat di persona registrá ku por vota, ni tampoko e kantidat ku ya a asistí pa vota.
Segun e dama kende no kier a identifiká su mes, nan no a haña outorisashon for di Venezuela pa duna niun klase di informashon enkuanto desaroyonan durante elekshon.
