WILLEMSTAD – Korte di apelashon dia 13 di yüli lo dikta sentensia den kaso Magnus/Maximus den kual e akusado Burney ‘Nini’ Fonseca a apelá e sentensia di 25 aña di prizòn ku el a haña den korte di promé instansia.
Teniendo kuenta ku embergadura dje kaso aki, korte di apelashon a tuma dos siman di tempu promé ku sera e kaso di forma ofisial. A hasi esaki, pasó un término di 3 siman ta muchu poko pa e hurado di korte di apelashon por a yega na un veredikto.
P’e motibu aki a trata e kaso dia 8 di yüni, pero a sera e kaso ofisialmente dia 22 di yüni i lo dikta sentensia dia 13 di yüli. Esaki a brinda poko mas espasio di manera ku korte di apelashon por studia e kaso bon i yega na un sentensia dia 13 di yüli próksimo.
Mas prueba
Korte di apelashon dianan 6,7 i 8 di yüni último a trata e kaso di apelashon di Nini Fonseca, den kual abogado general Angela i Rip a presentá mas material di prueba i mas deklarashon di diferente testigu.
Tantu abogado general Angela komo Rip a indiká durante tratamentu dje kaso, ku pa Ministerio Públiko tin sufisiente material di prueba kontra e akusado, motibu pa kual ministerio Públiko ta keda para riba un kastigu di 26 aña pa e akusado. Pa loke ta e defensa di parti abogado Marije Vaders, abogado general ta di opinion ku e abogado a trata na desbaratá e pruebanan presentá, pero pa abogado general e deklarashon di entre otro Gumbs i un dje testigunan anónimo ta di sumo importansia i ta sostené e akusashonnan.
Rumor
Abogado Vaders di su parti a indiká ku tur lokual abogado general a presentá komo prueba, ta basá riba rumor i lokual testigunan mes ta bisa ku nan a tende di otronan. Pues no tin niun deklarashon konkreto ku por para komo echonan palpabel kontra su kliente. Pa abogado Vaders, no por husga un akusado a base di kosnan ku un testigu a tende, sin ku e por supstansiá esaki.
‘Sprookje den su kabes’
Fonseca di su parti a indiká ku e no ta enbolbí den asesinato di parlamentario Helmin Wiels, pues e sigur no a duna niun enkargo, ni tabata esun ku a paga niun hende pa asesinato di Wiels. El a indiká ku e kaso aki ta manera ku ta un ‘sprookje’ ta pasa den su kabes. E akusado ademas no tabatin muchu bon palabra den direkshon di abogado general Rip, kende el a indiká mester bai buska un trabou komo ‘dealer’ den kasino na airopuerto.
