WILLEMSTAD – “Si no tabatin enseñansa grátis, ami no lo por a bai skol, pues nos mester yega na un solushon huntu. No por tumá e tipo di medidanan aki sin konsulta ku e alumnonan.”
Thyandro Maal di 16 aña ta den insertidumbre. Netty L., mama di sinku yu entre 23 pa 5 aña, tambe. Nan ta preokupá pa e futuro di enseñansa komo ku gobièrnu tin e intenshon pa aboli enseñansa grátis.
Thyandro Maal
Thyandro Maal – potrèt: Deya Mensche
Maal ta studiante di VSB St. Jozef, alabes miembro di parlamento hubenil. E ta sumamente preokupá pa hóbennan ku ta dependiente di enseñansa grátis pa por kompletá nan estudio. Den e kaso di Maal, su mama a fayesé ora esaki tabatin solamente 10 aña i fo’i dje dia ei ta kobra sosten di wérfano ku ta yuda kubri e gastunan.
‘Material pa skol i unifòrm ta asina karu ku e sèn no ta yega’
Netty ta konta ku promé ku a introdusí enseñansa grátis, su dos yunan mayó mester a stòp nan estudio pa motibu di nan situashon finansiero. Paso no tabatin enseñansa grátis, mester a paga skol privá pa nan kontinuá nan estudio. Despues di dos aña nan no por a kontinuá di paga esaki i e yunan mester a interumpí nan estudio.
Netty L.
“Nos ta traha, pero material pa skol i unifòrm ta asina karu ku e sèn no ta yegá. Ku bo ta kobra suèldo mínimo, kon bo ta kuminsá kubri tur e gastunan?”, e mama preokupá a splika. Segun Netty si gobièrnu mantené enseñansa grátis, esaki lo duna e famia mas espasio pa invertí den nan yunan sosialmente.
Análisis profundoNa aprel último, promé minister Eugene Rhuggenaath a anunsiá e abolishon di enseñansa grátis pa e próksimo aña eskolar pa asina baha gastu riba e presupuesto. Despues di e ola di krítika, ministerio di enseñansa Marilyn Alcalá – Walle a pidi pa SAOB ta hasí un análisis profundo pa determiná e ramifikashonnan di e medida i a posponé esaki te aña eskolar 2019 – 2020. Te ainda no a publiká e rapòrt akí. |
