DEN HAAG – “Aktitut indigno pa un minister di Asuntunan Eksterior’, asina OCan ta yama e pronunsiamentunan di minister Stef Blok (VVD) tokante Sürnam i e komunidat multikultural. E fundashon na nòmber di komunidat karibense ta eksihí despensa i un kombersashon ku gabinete.
Siman pasá Blok, durante un enkuentro privá a bisa ku e no konosé niun pais ku un komunidat multi-étniko òf multikultural kaminda ainda e poblashon original tambe ta biba i kaminda ta biba huntu pasífikamente. Ademas Blok a yama Sürnam un ‘failed state’ i el a bisa ku ‘probablemente ta genétikamente determiná ku nos no por haña un bon kontakto ku hende ku nos no konosé.’
Despues e minister ta bisa ku el a usa palabra muchu skèrpi i ku ta duel e ku el a ofendé hende ku e aktitut aki’.
‘Pidi despensa no por kamuflá e falta di konosementu i noshon históriko di e minister aki’
No opstante e despensa di Blok ainda e indignashon ta grandi, na Kòrsou tambe. E minister kurasoleño di Salubridat, Suzy Camelia-Römer por ehèmpel ta puntra su mes ‘kon por ta ku un minister di Asuntunan Eksterior, di un reino ku ta konsistí di kuater pais ku un komunidat multi-kultural, por yega na pronunsiamentu asina?’
“Kòrsou so kaba ta konsistí di un meskla di etnisidat, kultura i religion ku tur ta biba huntu den harmonia”, Camelia-Römer ta bisa. “Ta opvio ku tin un falta di konosementu kultural i históriko serka Blok, pidi despensa no por kamuflá esaki i p’esei ta mihó e baha komo minister.”
‘Nos a keda babuká i nos ta puntra nos mes si e por sigui komo minister’
Presidente di OcAN, John Leerdam, tin pregunta tokante e aptitut di Blok riba e posishon aki: “Nos a keda babuká i nos ta puntra nos mes si e por sigui komo minister.”
E fundashon ke un kombersashon ku gabinete hulandes. Nos ke sa ta kon nos ta bai sigui huntu awor. Tur loke a logra den e último 75 añanan ku e pronunsiamentunan aki a kibra.”
