Pòrtrèt: Roelie van Beek

WILLEMSTAD – Personanan ku frekuentemente ta hasi uso di transporte públiko tin diferente keho riba e kalidat di servisio, orario, tarifa i tambe e konekshon entre e diferente rutanan.

Pa mehorá e servisio, kalidat i yega na un transporte públiko mas konfiabel, Minister di tráfiko i komunikashon, Zita Leito ke bin ku un reorganisashon den e sektor.

 Outor Roelie van Beek

Na 2016, e kompania Re-Quest riba petishon di Fundashon pa Konsumidó a realisá un investigashon riba transporte públiko en general. Den e konklushonnan ta sugerí mehorashon tantu riba término kòrtiku komo término largu i ku ta rekerí alabes invershon.

Skemanan di ruta
Entre otro ta konsehá pa pone skemanan di ruta, inkluso orario i tarifa di bùsnan na e diferente paradanan di bùs. Tambe pa duna kurso di formashon na shofùrnan pa ta mas servisial i amabel. Tambe ta konsehá entre otro pa yega na mihó konekshon entre e diferente rutanan i tarifanan di bùs pagabel.

Minister Zita Leito-Jesus a splika ku su ministerio ta trahando riba un maneho pa por reorganisá e sektor di transporte públiko. T’e intenshon pa inkorporá e 400 bùsnan chikí den un koperativa ku konhuntamente ku ABC Busbedrijf lo tin di ehekutá e plan kual pa inisio di 2019 lo mester ta kla.

Tin usuarionan entrevistá ku tin krítika riba e diferensia di tarifa entre bùs chikí i konvoi, miéntras otronan ta kontentu ku bùsnan chikí ta drenta bario, kontrali ku konvoinan ku ta kore solamente rutanan pafó dje barionan.

‘No ta faktibel’
Di akuerdo ku Andres Everitsz kende ta presidente dje sindikato STU, e plan di minister Leito no ta faktibel. E ta indiká ku e kantidat di bùsnan chikí no ta sufisiente pa por yega na un koperativa. E ta sigui bisa ku di akuerdo ku lidernan grandi den mundu di koperativismo, e kantidat mester ta mas grandi pa e por ta eksitoso manera na Colombia, Venezuela, Brazil i otro paisnan den region.

Ademas e ta mustra riba e echo ku ABC Busbedrijf ta un kompania supsidiá pa gobièrnu, siendo ku bùsnan chikí ta ministerio di ekonomia mes ta stipulá tarifa di bùsnan chikí, siendo ku nan no ta haña niun klase di supsidio, ni no tin niun klase di areglo òf maneho pa nan haña niun klase di dispensashon di impuesto, di manera ku tarifanan di bùs chikí por ta mas barata.

Konosido shòfùr di bùs Humphrey Felipe a indiká ku mas di binti aña el a tende dje istorianan aki, pero tur a frakasá. El a indiká ku e problema, esta e mal kustumbernan ta manera un ‘kanser’ ku ta inkurabel.