WILLEMSTAD – E kantidat di pashèntnan ku HIV na Kòrsou a sigui krese, miéntras e edat di pashèntnan a baha I aktualmente Kòrsou su pashènt di mas hóben tin apénas 16 aña di edat.
Esaki ta debí n’e echo ku e kuido pa loke ta trata pashèntnan di HIV ta basta bon reglá, pero no tin plaka pa traha riba prevenshon di e malesa, di akuerdo ku Dudley Ferdinandus i Mario Kleinmoedig di Fundashon Cura+.
Mario Kleinmoedig i Dudley Ferdinandus den kòmbersashon ku Ramon Yung
Mario Kleinmoedig, kordinadó di proyekto na Cura+ ta mustra ku e kuido básiko, esta dòkter, remedi, hòspital entre otro ta reglá. Pero pa loke ta trata prevenshon no tin un maneho stipulá i e konsekuentemente eparti finansiero ta nulo. Na komienso di aña Kòrsou tabatin 2022 persona registrá ku tin HIV, di kual alrededor di nuebeshen pa mil ta personanan ku ta risibí tratamentu i ta hañando remedi pa esaki di akuerdo ku Cura+.
100 pashènt pa aña
E preokupashon di mas grandi serka Cura+ ta e echo ku den pasado tabatin un kresementu ku un promedio di 100 pashènt pa aña, pero aktualmente tin un indikashon no ofisial ku e kantidat por a alkansá 2 mil 200 pashènt.
Lokual sigur ta otro preokupashon serka Cura+ ta e echo ku e edat di esnan infektá ta bahando di forma konsiderabel i por a nota tambe un kresementu serka hende muhénan kasá, lokual ta un indikashon ku den hopi kaso e hòmber ta esun ku ta infektando su pareha na kas. Den hopi kaso, hóbennan ta tene relashon seksual ku personanan adulto sin usa protekshon, siendo ku por ta trata di un persona infektá ku e viro di HIV.
Aktualmente Kòrsou ta entre e islanan den Karibe ku un sifra di kresementu anual mas grandi pa loke ta trata e sifra di pashèntnan ku HIV, miéntras ku Haiti, Repúblika Dominikana i asta Sint Maarten ku tabatin e sifranan mas haltu den kresementu, ta bahando. Esaki ta debí n’e echo ku e paisnan aki tur tin un maneho stipulá pa loke ta trata prevenshon, siendo ku na Kòrsou no tin plaka pa por hiba kampañanan dirigí riba prevenshon di HIV.
Prevenshon
Dudley Ferdinandus, counselor i sekretario di Cura+ a mustra ku Cura+ no ta hañando supsidio di gobièrnu pa por traha riba e parti di prevenshon, pero komokiera nan ta hasiendo tur esfuerso i sakrifisio komo boluntario, pa por duna informashon i traspasá nan konosementu na otro lidernan di bario i òf organisashonnan lokal ku e meta pa frena e sifra kresiente di pashèntnan ku HIV.
Di sèptèmber pa dia 1 di desèmber, Cura+ lo lansa un kampaña di prevenshon den 13 bario, p’asina halsa e konsiensia den komunidat riba HIV.
Lesa mas: Konsientisashon di HIV: Nos tin di kambio nos aktitut pa ku seks
