Portrèt: Ronald A. Muyden

KRALENDIJK – E wèlga di e personal di kuido médiko di Fundashon Mariadal (FM) a para awe meinta. Minister di Asuntunan Sosial i Labor (SZW), Wouter Koolmees, ayera nochi lat den un karta a instruí e partidonan pa sinta rònt di mesa.

Entretantu e mandatario di SZW a nombra un mediadó den persona di Marushka Lee Tromp. Awe e lo huramentá serka representante di reino Jan Helmond. E personal ta eksihí un cao nobo.

Shete or ora lokal awe e tim di negoshashon di FM i representantenan di e sindikato Federashon General di Trahadó Boneriano (AFBW, Algemene Federatie voor Bonairiaanse Werknemers) lo tene un promé reunion di mediashon.

Norwin Willem durante e akshonnan di AFBW di kolaboradónan di Fundashon Mariadal. Potrèt: Ronald A. Muyden

“Lei ta preskribí ku ora a pidi mediashon, mester para e akshonnan”, segun sekretario di USIBO Norwin (Nòchi) Willem, ku ta sostené AFBW komo organisashon kordinadó pa sindikatonan na Boneiru. Banda di e mandato aki e minister di SZW a pone 90 dia mas komo periodo pa plakia kontroversia, si akaso e partidonan no bini kla ainda.

E sindikato a bisa ku djabièrnè nan a trata di rekurí na e mediadó, pero a resultá ku e ta malu i e ora ei ainda no a nombra un mediadó suplente pa islanan BES.