KRALENDIJK- E wèlga di e personal di kuido na Fundashon Mariadal (FM) ta kontra e Arbeidsgeschillenwet BES (Lei di disputa laboral BES). Asina e kabes di e unidat di Asuntunan Sosial i Empleo (SZW) di Rijksdienst Caribisch Nederland (RCN) Erik Brakke ta bisa.
E sindikato AFBW no ta aster esaki. “Esun ku por disidí ta e hòmber bistí na pretu; wes.”
E personal ta eksihí un CAO nobo.
Un reportahe di Ronald A. Muyden
No a empleá un intermediario. Esaki si ta stipulá den lei, segun e kabes di SZW ku ta aktua na nòmber di e minister di Asuntunan Sosial i Empleo, Wouter Koolmees.
Segun e sindikato tin un konvenio internashonal ku ta mas haltu ku e lei lokal aki. E sindikato ta apelá: p’esei e wèlga lo sigui normalmente. Sí AFBW ta para habrí pa intervenshon di un mediadó. Esaki no tabata disponibel djaluna.
A oumentá seguridat
Un kliente ta puntra e trahado di seguridat tras di un bali blanku kon e por yega e laboratorio di kue sanger. E trahadó di seguridat ta konstatá un oumento chikí di pregunta . “Normalmente mi t’aki mi so, pero ayera nos tabata nos dos, un pafó i un na bali.” For di djadumingu FM a oumentá seguridat. E motibu no ta konosí.
Sinku persona di e diferente departamentonan di FM ta kana bai e tènt blanku riba un tereno di parker dilanti di e entrada prinsipal di e klínika. “Mi no ta laga e Konseho di Direkshon Fundashon Mariadal (RvB FM) intimidá mi”, un di esnan ku ta wèlga ta grita.
E kolaboradó aki ku tin 25 aña den servisio di FM, ta referí na un komunikashon interno ku djadumingu a manda pa tur kolaboradó. Rvb FM ta di opinion ku e walkout di djabièrnè último no tabata un akshon legal. Pasobra nan ta suponé ku e kolaboradónan ku a partisipá na e walkout a kere ku esaki tabata trata di un akshon kolektivo legítimo, FM a disidí di no imponé ‘konsekuensha personal’.
‘Ún wèlga mester ta e último rekurso’
Ku e akshon aki FM a klarifiká su posibel medidanan disiplinario. Esun ku wèlga por haña un suspenshon inmediato pa tres dia sin salario si ninga di traha, òf den kaso di negligensha òf disturbio. “Un wèlga òf walkout mester ta e último rekurso. No mester ta un akshon ku ta tuma mésora. I aktualmennte ta esaki ta eksperensiá”, segun Danny Rojer, manager di kuido i miembro di e tim di maneho di FM.
Kuido ku ta alterná
Un botikario ku awe ta liber tambe ta presente. El a pega un sinta pretu riba su blusa. E botikario ta bisa ku e tei pa sostené su koleganan. “Mi a kushiná i mi a kue bùs pa yega aki.”
Fundashon Mariadal tin botika na tres lugá. E botikanan na Antriol i Rincon tabata será te mas o ménos 11 or. Na petishon di e tim di maneho di FM nan a habri despues, kaminda nan ta tuma turno manera na Playa serka Fundashon Mariadal.
Tur departamento di e hòspital ta operashonal durante e wèlga, ku e sistema di sirkulashon di e sindikato