‘Seramentu di hotèl no ta peligrá kresementu di turismo’

12 September 2018 | Dulce Koopman

WILLEMSTAD – E seramentu di hotèlnan grandi manera Plaza Hotel, Howard Johnson, Veneto Hotel i Kurá Hulanda na Kòrsou, no ta representativo pa e estado di e desaroyo turístiko. Asina Miles Mercera, e presidente i direktor di e Curaçao Hospitality & Tourism Association (Chata), ta bisa.

Mientrastantu e Curaçao Investment & Export Promotion Agency (Cinex) ta mèldu ku Kòrsou mester di sinku biaha mas tantu kamber di hotèl. “Esei no ta alkansabel”, e lider sindikal den horeca, Kenneth Valpoort, ta duna komo reakshon. Sinku biaha mas tantu kamber kier men 5 biaha 5.000 kamber. “Nos lo mester tin 12.000 empleado den horeca tambe.”

Planifikashon
Valpoort ta haña esaki ta zona ‘hopi bunita i optimista’. “Kresementu di e kantidat di kamber di hotèl mester bai di forma konstante i segun plan. Banda di esei mester tin personal kualifiká tambe pa akompañá esaki.”

E lider sindikal ta lamentá ku na e momentunan akí tin diferente hotèl grandi ku a sera òf ku lo bai bende na findishi. “Nos mester ta kouteloso ku ekspreshonnan ku no ta realisabel.”

Vakatura
E sektor turístiko ta bon pa mas ku 20 porshento di e produkto bruto nashonal di Kòrsou. Segun Mercera tin masha hopi vakatura pa e personal di hotèl ku ta riba kaya aworakí. “Turismo no ta hotèl so, sinó tambe diferente supsekshon manera skol pa sambuyá, restorant i kompanianan pa hasi limpiesa.”

E konosido Plaza Hotel den Willemstad tin un tempu kaba bandoná. Potrèt di archivo: José Manuel Diaz

Chata ta rechasá e persepshon ku ta tur hotèl riba e isla ta den problema i ku esaki tin influensia riba e sektor. E aña akí a mira un oumento supstansial den preis pa kamber pa anochi i tambe den e okupashon di hotèl. “Kompará ku e área di Karibe nos ta mas o menos na e averahe pa okupashon di hotèl. Ta solamente ku e preis pa kamber pa anochi Kòrsou ta un tiki mas abou ku e region. Pero esei no tin nada di haber ku e hotèlnan akí.”

Marriot hotel
Mercera ta enfatisá ku Marriot hotel, ku ta temporalmente será, no ta den problema. Tin un invershonista nobo ku lo renobá e hotèl i ku ‘lo bai brinda un mihó produkto’.

“Esei tabata e problema ku e hotèlnan ku si mester a sera. Nan no tin e produkto ku nos ta para p’e i ku Kòrsou ke ofresé realmente.” Mercera ta referí akí na ‘kamber- i fasilidatnan bieu’.

Produkto nobo
Nos ta na fabor di ku e hotèlnan bieu ta sera pa un òf dos aña, ku nan ta haña un kumpradó nobo, ku un invershon tuma lugá i ku nan ta habri di nobo ku un bon produkto. Asina ta sosodé na otro parti di mundu tambe”, Mercera ta indiká.