WILLEMSTAD – E koalishon di Kòrsou ta sostené e filosofia di Blue Economy, asina tin pará den e akuerdo di gobernashon 2017-2021. Gabinete ta boga pa un ekonomia di resiklahe kaminda lo usa rekurso natural na un manera responsabel i lo resiklá shushi. Te awor e inisiativa p’esaki ta bini di personanan privá, manera esnan ku a bini ku Limpi Curaçao.
Debrah Nijdam i Mitchell Lammering ta dos ingeniero hóben ku ta usa nan konosementu di Industrial Product Design pa traha algu nobo ku shushi di plèstik tirá riba kaya: yabero, kapa di lampi, ònderlèger i suvenir artístiko.
Aña pasá Limpi a gana e Junior Innovation Award í e People’s Choice Award. Debrah i Mitchell a finansá nan negoshi nan mes; di nan sèn di spar nan a kumpra material pa traha mashin pa frakshoná plèstik i pa traha e malchinan ku por basha plèstik ku a dirti aden.
World Clean Up
Resiklahe di shushi di plèstik tirá riba kaya ta un di e puntanan di sper di The Blue Economy. Personanan privá, fundashon i kompania ta organisá Clean-Ups na e isla, manera World Clean Up di djasabra ku a pasa.
“Bo ta kla pa un reto nobo?”, asina e slogan di Fundashon Blue Economy Curaçao, ku a lanta dos aña pasá, ta bisa. Patrosinadora Suzy Camelia-Römer na kaminda pa elekshonnan di 5 di òktober 2016 a invitá komunidat kurasoleño pa un lunch di fundraising riba 22 di septèmber di e aña ei. E konferensiante tabata Gunter Pauli, ku ta esun ku a pensa The Blue Economy.
Enkuentro ku tabata kosta 350 florin
Mas o ménos dosshen hende a bishitá e enkuentro ku kada un a paga 350 florin pa kubierto. Gunter Pauli ku ántes tabata doño di e kompania flamenko Ecover, ku ta spesialisá den produkshon di produkto di limpiesa ku ta biológikamente degradabel, a duna un presentashon di proyekto ku por generá entrada pa Kòrsou sin hasi daño na naturalesa.
Alvin Daal, miembro di e direktiva di e Fundashon Blue Economy Curaçao pa 2017 a anunsiá ku lo tin seminar. E eventonan aki ku Banko PBS, UTS i Aon a spònser a keda sin tuma lugá.
Ganashi di hopi kantidat di dies mil florin
Presidente Aimee Kleinmoedig ku ta traha na Ofisina di Telekomunikashon i Pòst, no tin kontesta riba e pregunta kiko a pasa ku e kantidatnan di dies mil florin ku a rekoudá den e fundraising. “Nos ta un fundashon privá, nos no tin nodi di duna kuenta na medionan di komunikashon tokante esaki”. Kleinmoedig no por bisa si lo sigui mas evento.
Resientemente Limpi Kòrsou a kuminsá un koperashon ku e kompania lokal di resiklahe Green Force, tambe un inisiativa privá, pa trata e problema di shushi tirá riba kaya i e produkshon di artíkulonan nobo na un eskala mas grandi.
