DEN HAAG – Kuantu sèn un hende na Boneiru, Saba i Sint Eustatius tin mester minimalmente pa por biba? Partidonan di oposishon SP i GroenLinks ke fòrsa gobièrnu hulandes pa ainda establesé e mínimo sosial.
Gobièrnu hulandes ta ninga di menta e montante, miéntras ku Eerste i Tweede Kamer sí a duna gobièrnu e òrdu. No opstante tur rapòrt, sekretario di estado Tamara van Ark (Asuntunan Sosial) ta bisa ku e no por establesé un montante mínimo pasobra e sirkunstanshanan di bida ta diferente.
Partidonan di oposishon SP, GroenLinks i PvdA no ta satisfecho. “Nos ta hasi esaki pa tur munisipio den e parti oropeo di Hulanda. Ke men pakiko lo no ta posibel pa hasi esaki pa Boneiru, Saba i Statia?”, segun Van Raak (SP).
Riba inisiativa di Van Raak (SP) Tweede Kamer ta kontinuá e debate djárason pa establesé e mínimo sosial. Huntu ku Groen Links van Raak ke entregá kasi e mésun moshon ku a aseptá dos aña pasá.
E moshon lo haña sosten?
E intenshon di Van Raak ta pa duna gobièrnu hulandes un señal ku e suma ku Kamer a pidi p’e mester estables’é mas lihé posibel. E pregunta ta si e partidonan ku entre tantu ta sinta den gobièrnu, lo duna nan sosten di nobo.
Na òktober 2016 kasi tur partido ménos VVD i PVV a sostené e moshon pa establesé e mínimo sosial. “Lo mi haña masha straño si CDA, D66 i ChristenUnie, ku a firma pa esaki dos aña pasá , awor no firma.”, Van Raak ta reakshoná. “Pasobra e plannan ku t’ei, ainda ta masha vago i no a establesé e mínimo sosial.”
CDA ta laga sa den un reakshon ku nan lo no sostené e moshon di SP/GL, pasobra nan tin komprenshon pa e splikashon di sekretario di estado Van Ark na Tweede Kamer. Esaki den e dos añanan binidero ke purba baha e gastunan di bida promé.
Tantu Christen Unie komo D66 ainda ta pensando kiko nan ke hasi. “D66 ainda ta pro un mínimo sosial legal i djárason ke haña mas klaridat di e sekretario di estado.”
‘Tras di kòrtina’ ainda den koalishon ta trahando riba un moshon nobo. Un opshon ta pa adaptá esaki na SP.
‘Mester di un programa manera na Hulanda pa barionan ku un atraso’
CDA ke duna gobièrnu tempu pa entre otro regla kas di hür sosial i baha kosto di bida den e munisipionan ekstraordinario.
Joba van den Berg (CDA) tin e intenshon pa djárason e mes bini ku un moshon. Gobièrnu hulandes segun CDA mester kuminsá traha plan pa kada isla, pa asina den futuro nan por kuida nan mes i bira mas barata.
Van den Berg ta pensa por ehèmpel pa lanta agrikultura, drecha transpòrt públiko i eduká ámtenar. “Segun nos mester bini un programa manera nos tin na Hulanda pa bario atrasá, ke men un plan di sinku pa dies aña.
