KRALENDIJK – E presupuesto di e munisipio ekstraordinario hulandes Boneiru riba 15 di novèmber lo ta riba lèsenar di sekretario di estado di Asuntunan Interior i Relashonan den Reino, Raymond Knops.
Esaki diputado Hubert Martis, responsabel pa Finansa, ta primintí. Ku esaki gobièrnu lokal entre otro ta spera di evitá ku Konseho di Minister di Reino lo intervení (instrukshon).
Siman pasá Kolegio supervishon finansiero BES (Cft, College financieel toezicht) despues di un bishita na e isla a laga sa ku ainda Boneiru no ta tene si mes na e normanan legal, ni no ta kumpli ku palabrashon ku CFT. “Si e situashon aki no mehorá, un konseho pa un instrukshon ta inevitabel”, segun presidente di Cft Raymond Gradus.
Asina e maneho finansiero ainda ta laga hopi di deseá, e supervisor ta haña. Ademas atrobe gobièrnu ta lat ku entrega di e presupuesto di 2019 i e kuenta anual di 2017. Kaminda a posponé anteriormente kaba.
Pero diputado Martis ta haña ku Cft den e análisis di e kuenta anual di 2017 no a tene kuenta ku su koalishon a kuminsá goberná te na ougùstùs di aña pasá numa. “Esaki ta duna un idea robes.” E ta garantisá ku e kuenta anual di 2018 lo ta kompletamente distinto di loke tin riba mesa aktualmente.
Diputado Hubert Martis – potrèt: Ronald A. Muyden
Falta di kapasidat
Ademas e supervisor no ta tene kuenta ku e falta di spesialista finansiero, Martis ta bisa. Den su palabrashonnan ku Cft el a bisa ku pa motibu di e falta aki e deadline legal no ta realista. Pero nan no a keda kontentu ku e informashon aki, segun Martis.
Segun e a traha duru pa yena e vakaturanan. “Nos a tuma tres hende pa e departamento di finansa. Un di kuater ta pendiente i consultant tambe lo bai yuda nos ku e maneho finansiero di gobièrnu.”
E diputado ta bisa ku gobièrnu hulandes ta na altura di e problema di kapasidat. “Nos a papia di esaki riba nos agènda di prioridat. I Hulanda a primintí hende tékniko pa yuda.”
Pero nan ta bini ora a firma e akuerdo di gobernashon, fin di e luna aki.