WILLEMSTAD – Habitante di Kura’i Shon Fil tin sintimentu miksto tokante e proyekto di renobashon di nan bario. Union Oropeo (UO) ta finansiá e proyekto. E habitantenan ta indiká ku nan ta kontentu ku porfin ta drecha nan bario, pero nan tin miedu tambe di e kambionan ku esaki ta trese kuné.
Un reportahe di Deya Mensche
“Nos ta realisá si ku bo no por para e desaroyo i e invershonnan, pero no ta pòrnada UO ta invertí den un bario”, habitante di bario Jansen ta bisa. E mes i otro habitante ta teme ku lo pone nan riba kaya na mal òrdu si nan no por paga e oumento di hür despues ku a drecha e kas.
Habitante di bario Jansen ta wak e mehorashonnan den su bario ku deskonfiansa. Potrèt: Deya Mensche
Segun Jansen, mirando ekonomia i e situashon laboral insierto na Kòrsou, ta masha difísil pa un habitante lokal ku tin hopi aña kaba ta biba den e bario haña un hipotek serka banko, i asina nan partisipashon lo keda limitá.
Gentrifikashon
Pa falta di un plan ku ta manehá edifisio dekaí, gobièrnu ta permití gentrifikashon [revaluashon di e bario pa asina pone preis di propiedat inmóbil subi, red.) den e barionan di Kòrsou. Asina Dennis Klaus, arkitekto i habitante di mas ku 20 aña di Otrobanda, ta bisa. “Hopi bia ta pa motibu di desakuerdo bou di heredero ku no ta hasi nada ku e edifisionan, òf no por haña e herederonan pasobra e famia ta masha grandi mes, òf e famia no ta interesá.”
Si ta trata di un monumento gobièrnu por fòrsa e doño pa restorá e edifisio pasobra lei ta preskribí ku bo tin e deber di mantené e propiedat.
“Gobièrnu no tin vishon pa e barionan i ainda no tin un planifikashon urbano ku ta evidente”, Klaus ta bisa. Tòg e arkitekto no ta kere ku gentrifikashon lo tuma lugá dje lihé ei den Otrobanda, pasobra tin hopi hende ta biba den e bario.
Doño di Snèk di Pèchi. Potrèt: Deya Mensche
Silberie, doño di Snèk di Pèchi, for di 1977 ta biba den Kura’i Shon Fil i e ta positivo. “Mi por biba ku tur sorto di hende i mi ta kontentu ku e perpesktiva nobo, pasobra awor ku a kaba di drecha e kasnan, e ladronnan por bandoná e bario.”
No tin trahadó lokal
Na òktober di aña 2017, Federashon Otrobanda, huntu ku promé minister Eugene Rhuggenaath i minister Zita Jesus-Leito (Planifikashon Urbano), a tene un presentashon pa e habitantenan, kaminda el a splika kon lo renobá e kamindanan i ku lo konstruí un plenchi di rekreashon.
“Promesa falsu, tur”, habitante Ronald Senior ta bisa. “Nan di nos lo haña trabou, pero awor a bin sali ku tur trahadó ta traha serka e kontratista mes.”
Mike Brissett, presidente di Komishon Kura’i Shon Fil, no ta lamentá tampoko ku no tin mas habitante envolví den e rekonstrukshon di e bario. Kontratista MNO Vervat ta traha ku mashin di koba i a atraé un kompania privá pa hasi esaki, Brissett ta bisa. “Nan a tuma dos hende den servisio pa tèst, anto despues nan ta wak si tin mas empleo.” E proyekto mester ta kla na luna di mei di 2019
