WILLEMSTAD – Alumnonan di Marnix College, un skol d VSBO, ta gosa di nan pouze bou di e afdaknan den plenchi di skol. E vèlt ku banki ta yen di awa. E alumnonan sintá riba e bankinan kasi ta sinta ku nan pianan den awa. Algun yalusí di e sala di gemnastik ta seka di bini abou. E lès di gemnastik no ta sigui, pasobra den e sala di gemnastik awa ta kai mes duru ku pafó. No tin sèn pa drech’é.
Maghalie van der Bunt-George, direktor di Asosiashon di Enseñansa Protestant Kristian (VPCO, Vereniging Protestants Christelijk Ondrwijs) no ta aseptá mas. Poko tempu pasá e mes i un delegashon di VPCO a bai serka promé minister Rhuggenaath pa trese e situashon malu den enseñansa bou di su atenshon.
Nada nobo
No ta nada nobo ku tin muchu poko sèn pa enseñansa. E Fundashon Ofisina di Accountant di Gobièrnu a konstatá esaki for di 2011. No tabata trata solamente di mantenshon sino tambe di material pa skol, ICT, limpiesa i e resibu di koriente.
VPCO tur aña a base di e sistema di V&V ta haña 17.500 florin pa mantenshon serka Fundashon Mantenshon di Skol. Van der Bunt-George ta haña ku su organisashon di enseñansa tin derechi riba un finansiamentu komparabel ku esun di Dienst Openbare Scholen i Stichting Rooms Katholiek Schoolbestuur. Esakinan por ehèmpel tin un departamento di Human Resources, VPCO no ta haña sèn p’esaki pasobra ta konsiderá nan un organisashon chikí. Pero VPCO a krese bira un organisashon ku 240 trahadó.
‘Atenshon pa enseñansa den nesesidat’
Tin shete skol ku mester di mantenshon pronto. Esaki ta kosta un mion florin, Van der Bunt-George ta bisa. Pero e no a pidi promé minister esaki. E ta haña ku ta mas importante pa enseñansa den nesesidat haña atenshon. “Si gobièrnu no duna sèn nos mester buska otro kaminda. Kisas serka komèrsio, kisas tòg serka e mayornan ku sí tin moda.”
‘Si gobièrnu no duna sèn nos mester buska otro kaminda’
E direktor di VPCO no ke bisa kuantu mester invertí pa adaptá su skolnan na tempu moderno. Aktualmente ta modernisá un tiki un tiki. Mayoria bia esaki ta sosodé ku e sèn di kontribushonnan di e asosiashon. Ku esaki aña pasá a kumpra un método di lesa nobo pa enseñansa di fundeshi.
Menasa di un instrukshon
Ta di mira ainda si VPCO i tambe e otro organisashonnan di enseñansa lo haña mas sèn serka gobièrnu e temporada ku ta bini. Gobièrnu den e último simannan a hasi tur loke ku e por pa evitá un konseho pa un instrukshon di Cft na Konseho di Minister di Reino. Si gobièrnu di Kòrsou hañ’é ta hala un strepi kòrá grandi den e diferente plannan, ta di puntra ku nan lo keda sin inkluí enseñansa den esaki.
