DEN HAAG – Ta haña supsidia si òf nò? E organisadó di e konmemorashon nashonal di sklabitut tur aña atrobe ta hañ’é ku insiguridat. P’esei parlamento hulandes ke pa for di awor i den futuro nan por keda konta ku supsidio.
Boluntario ‘porfin ta haña un tiki siguridat’ , ta reakshon di e esun ku a entrega e moshon: Nevin Özütok (GroenLinks). Un mayoria den parlamento ta di akuerdo ku e insiguridat di tur aña ‘no ta deseabelpa un konmemorashon ku un karakter nashonal’.
Fundashon Ninsee ta papia di ‘un bon desaroyo’. “Manera ta bai aworakí tur aña ta un kansansio. Esei no ta e manera ku bo ta trata ku un momento importante den historia. Nos ta kontentu ku e inisiativa.”
Krítiko
VVD, PVV, SGP i Forum voor Democratie a vota kontra. Ta un moshon di ‘feel good’di kua e teksto ‘no ta klòp’, ta opinion di parlamentario di VVD André Bosman.
“E finansiamentu mester sosodé metikulosamente”, Bosman ta enfatisá. “Tokante kua di tur e konmemorashonnan e moshon aki ta trata? Na Middelburg i Tilburg tambe tin konmemorashon di sklabitut. No ta prudente pa komo parlamento bisa: anto nos ta regl’é.”
Anteriormente e aña aki a bira konosí ku e kantidat di konmemorashon di sklabitut ta oumentá na Hulanda.
Minister di D-66 Kajsa Ollongren di Asuntunan Interior ta positivo tokante e moshon. Promé ku 1 di mei gobièrnu lo laga sa kon por regla e supsidio anual pa e konmemorashon nashonal mihó.
Dia liber ofishal
Özütok (Groen Links) ta haña ku polítika mester duna mas atenshon na e pasado di sklabitut. Anteriormente riba Prinsjesdag el a bisti un lensu di mara kabes krioyo komo statement.
Su partido tin masha gana di bai un paso mas aleu. “Nos ke pa bini un dia liber ofishal pa selebrá abolishon di sklabitut. Esei ta un deseo di nos kurason”, Özütok ta bisa. Pero den parlamento no ta haña un mayoria p’esaki. Ta GroenLinks i Denk so ta simpatisadó.
‘Konmemorashon nashonal?’
Segun Ninsee tin hopi trabou ainda. Direktor suplente Urwin Vyent ta mustra ku e konmemorashon ainda no ta ‘nashonal’. “Legalmente ainda e no a haña e título nashonal. Anto esaki miéntras ku gobièrnu i kas real si ta bisa esaki.”
