WILLEMSTAD – “Si hende no por haña un kas di hür pagabel aki, mayan nan ta pará na Hulanda” asina Arthur Con, direktor di e fundashon pa kas sosial Fundashon Kas Popular (FKP) ta bisa. E ta boga pa koperashon na nivel di Reino pa haña kondishon di krédito favorabel pa konstrukshon di kas pa pueblo.
Pa Fundashon Kas Popular na Kòrsou un interes di hipotek di 5 porshento ta e mihó kondishon di fiansa ku e fundashon a atkirí. “Komo fundashon nos por pidi fiansa lokal so, no na Hulanda. Esei ta e gobièrnunan huntu so por realisá”, Con ta bisa.
Na Hulanda pa personanan privá e interes di mas abou di hipotek ta 1.00 porshento, 4 porshento mas abou ku e interes di mas abou na Kòrsou. “Pa kada porshento ménos di interes di hipotek , na Kòrsou ta kita 10 porshento for di e preis di hür”, Con ta bisa. E ta enfatisá ku e bahamentu di e preis di hür pa hopi hürdó ta un nesesidat.
FKP ta dependé di gobièrnu pa haña tereno ku ta kla pa konstrukshon i pa infrastruktura : trahamentu di kaya, lus di kaya, riolering, previshon di koriente i awa.
E lista di espera ta krese
E lista di espera di FKP di hende ku ta buska kas entretantu a krese bai te mas ku 9000 hende, di kua ta konsiderá 900 komo urgente. Entretantu a pone algun famia biba den un skol bieu.
FKP ta manehá 3.500 kas di gobièrnu i 1.500 kas di FKP. For di lantamentu di e fundashon, kuarenta aña pasá, e responsabilidatnan di FKP i di gobièrnu no ta fihá den un kòntrakt. FKP tin aña largu ta insistí serka gobièrnu pa bini un akuerdo di maneho, kaminda gobièrnu ta aliá su mes ku e pago di supsidio di hür pa esnan finansieramente mas suak.
Direktor di FKP Arthur Con. Potrèt: Jacqueline Hooftman
Kolegio di supervishon finansiero(Cft, College financieel toezicht) a konsehá gobièrnu pa duna atenshon na e palabrashonnan ku FKP. E debe di gobièrnu na FKP den forma di supsidio di hür atrasá a subi bira mas ku 100 mion florin. “Entretantu nos a konstatá ku tin un akuerdo entre gobièrnu di Kòrsou i FKP kaminda a atendé e riesgo di FKP sufisientemente”, asina presidente di Cft Raymond Gradus a bisa luna pasá.
Ainda no tin akuerdo
Direktor Con di FKP ta splika ku e fundashon lo apsolbé e debe di gobièrnu si nan haña e akuerdo di maneho deseá. Pero te dia djawe no ta eksistí un akuerdo entre FKP i e ministernan responsabel Zita Jesus-Leito di Tráfiko, Transpòrt i Planifikashon Urbano (TTPU) i Hensley Koeiman di Asuntunan Sosial, Labor i Empleo (ASLE).
E deadline pa firma e kòntrakt tabata 31 di òktober. Un dia promé e ministernan di TTPU i ASLE a duna maneho di FKP un konsepto di un akuerdo di maneho. Ainda ta negoshá tokante e konsepto aki.
‘Ta bon a pone tarea riba papel, pero esnan ku ta buskando kas no tin niun benefisio di esaki’
“Pa FKP ta bon ku ta poné e tareanan riba papel, pero esnan ku ta buska kas por lo pronto lo no benefisiá di esaki”, Andrea Kwidama, manager Sektor Sosial di FKP, ta bisa. “FKP no tin sèn pa drecha tereno pa konstrukshon. Ta gobièrnu mester hasi esaki. Tanten ku gobièrnu no pone plaka disponibel, e míles di buskadónan di kas mester keda warda te ora un kas bini liber.”
Warda hende bai òf muri
Den e último dies añanan kuater pa sinku bia pa luna un kas tabata bira bashí. “Den mayoria di kaso pasobra e habitante a muri, Kwidama ta bisa. “Último tempu ta ocho pa luna. Esei ta pasobra e habitantenan ta sali for di Kòrsou.”
