WILLEMSTAD – Promé minister Eugene Rhuggenaath di Kòrsou komo mucha tabata soña di bira sòldá. Komo tiner e tabatin difikultat pa ta su mes. I awendia lo e tin gana di tin un sixpack pasobra señora Rhuggenaath lo gusta.
Den algun minüt Kendra (11), Fabian (11) i Adama (11) den un entrevista desarmante a sa di revelá bida personal i dilema di Kòrsou su promé minister.
Pa e entrevista e muchanan a haña asistensia di e periodista kurasoleño Sullin Passial di e plataforma di notisia online Kidscorrespondent. “Nos a guia nan ku un ehersisio un ratu promé ku e entrevista a kuminsá. pero esei ta tur kos. Nan mes a pensa tur e preguntanan.”
Outor Kidscorrespondent (Na Hulandes)
E muchanan mes a skohe pa tene e entrevista na hulandes. “Pa e momento ei nan a haña esaki adekuá”, Tako Rietveld, ku a lanta Kidscorrespondent, ta splika.
‘Na Jeugdjournaal hopi bia mi tabata pensa mi ke tende e muchanan ei’
Rietveld dies aña largu tabata reportero pa Jeugdjournaal di NOS. Ei a surgi su idea pa Kidscorrespondent. “Na Jeugdjournaal hopi bia mi tabata pensa ‘mi ke tende e muchanan ei’. Mi a ripará ku mi tabata frustrá pasobra tabatin mas adulto ku mucha mes ku tabata bini na palabra, tambe ora tabata trata di mucha.”
E proposishon di Rietveld pa un ret internashonal di koresponsal hubenil a haña un resepshon miksto serka NOS. “Mi hefe a reakshoná entusiasmá, pero alabes masha lihé a yega na e konklushon ku no tin plaka pa esaki. Ademas NOS no ta haña ku ta su tarea pa mundialmente laga mucha na palabra.”
‘Ta nos soño pa nos bira un ret mundial’
Ku doló den su kurason Rietveld a kita trabou na 2015 i, ku ayudo di entre otro Maduro Kinderfonds, a kuminsá ku Kidscorrespondent na Hulanda. For di novèmber e periodista kurasoleño Sullin Passial tambe a djòin e ret komo koresponsal di mucha espesialmente pa Karibe.
“Ta nos soño pa bira un ret mundial”, e periodistanan ta konta. Tin plan kaba pa koresponsal hubenil na China, Estádos Unídos i Bolivia.
