EINDHOVEN – “Mi ke bira e promé futbolista profeshonal antiano riba krùk.” Asina Francis Maria (24) ta bisa; e ta hunga futbòl serka e tim hulandes di amputashon. E tim, ku a kuminsá hunga kuminsamentu di e aña aki bou di PSV, e temporada aki asta lo partisipá na Europa League.
Francis Maria tabata biba serka su mama ainda na Kòrsou ora, diesdos aña pasá a deskubrí ku e tin kanser di wesu den su pia drechi. Na 2006 a amputá su pia na Leiden. “Mi tabata kontentu ku a kita mi pia pasobra asina mi no tabatin kanser mas”, Maria ta bisa. Na karson kòrtiku el a bai Kòrsou bèk. “Pa mustra henter mundu kon mi a keda ku mi ‘pia di robòt’.
Pero Maria mester a bai Hulanda regularmente. Den kuminsamentu kada tres luna, despues dos bia pa aña. Na 2013 el disidí di keda Hulanda, pasobra keda bula bai bini tabata bira hopi karu i tabata kosta tempu.
Maria tin dos aña awor sin kanser di wesu. “Nan ta bisa ku bo ta liber di kanser di wesu despues di dies aña i pa mi ta diesdos aña pasá ku a kita mi pia.
‘Mi a haña hopi kuido, esei mi ta duna bèk awor’
Maria por yuda su mes masha bon ku su pia di robòt. E ta biba na Assen. E ta trein tur siman ku e tim di amputashon. E ta sigui e estudio di Kuido Sosial i e ta traha den kuido tambe. Bon mirá esaki ta su mishon.
Maria a skohe pa kuido pasobra despues di su amputashon e tambe a haña hopi kuido di su famia. “Mi ruman muhé na Kòrsou mester a hisa mi bai ducha tur dia i hiba mi mi ròlstul bèk. Mi a haña hopi kuido di mi mama. E kuido i amor ku mi a haña mi tabata haña asina bunita. Esaki mi ta pasa pa otro hende awor.
Na Assen Maria for di 2016 ta traha komo guia pa hende ku hèndikèp na Coöperatie Voor Elkaar di Vanboeijen. Un organisshon ku ta empeña pa hende ku un limitashon. “Bo ta kushiná, yuda ku ducha, limpia djente, duna remedi i bo ta hasi diferente aktividat ku nan: kore baiskel, hunga, wak sine ets.”
Francis ta traha komo guiadó di hende ku hèndikèp – potrèt: Sam Jones
Plan B
Si e bira e promé hungadó profeshonal di futbòl antiano ku krùk, e no tin nodi di traha den kuido mas? Maria ta hari. Maske ku mi ta pròf mi ke haña diploma. Mi tin un pia so i mi ta usa e pia aki hopi. Kana, hunga futbòl, hasi deporte. Mi mester kuida e pia bon. Si mi haña leshon òf kibra mi pia mi no por hunga futbòl mas. E ora ainda mi tin plan B den mi saku; traha den kuido.”
‘Mi ke mustra ku bo por hasi hopi kos ku un pia so!’
“Maske mi falta un pia, ami no ta pone mi mes para den huki.” E ta hasi tur sorto di kos. Nèt e kosnan ku bo lo no ferwagt: yuda otro hende, hunga futbòl, atletismo, landa i asta ski. “Mi ke mustra ku bo por hasi hopi kos ku un pia.
Futbòl amputáUn bia pa siman e ta trein e tim di amputashon na un di e vèltnan di PSV na Eindhoven. E tim ta e promé klup profeshonal di Hulanda ku ta hunga futbòl amputá. Tur hungadó den e tim tin un limitashon físiko: mayoria di nan falta un pia, algun di nan un brasa. For di siman pasá e klup profeshonal di PSV ta sostené e Fundashon Futbòl Amputá Hulanda ku for di 2017 ta eksistí. E tim, ku tin 11 mucha hòmber ta hunga, ta konsistí di miembro ku ta bini for di henter pais. Te poko tempu ei nan tabata trein solamente kada djadumingu na Vleuten. For di kuminsamentu di e aña aki nan ta trein tambe ku sosten di PSV, PSV Foundation, Zwaluwe Jeugdactie, Uniek Sporten Zuid-Brabant i Eindhoven Sport na Eindhoven. Komo ku awor nan ta hunga futbòl amputá bou di alanan di PSV , for di e temporada 2019-2020 e klup asta por partisipá na Europa League di futbòl amputá. |
