WILLEMSTAD – Reinan largu dilanti pòmpnan di gasolin na Kòrsou djamars, despues ku djaluna anochi a bin sali na kla ku e negosiashonnan entre Refineria di Kòrsou (RdK) i Motivá Enterprises di Estádos Unídos a para inmediatamente. Motivá tabata e kandidato preferí ku e aña aki lo por a a tuma e eksplotashon di e kompania venesolano estatal di zeta PdVSA ofer.
Tur hende ta kore bai pòmp di gasolin pa buska gasolin i disel, pa miedu ku e trahadónan lo sabotiá e distribushon di gasolin pa e pòmpnan di gasolin. Tin hopi eksitashon durante e reunion di urgensia djamars, ku ta tuma lugá den e edifisio di e bònt di Isla PWFC. Promé minister Eugene Rhuggenaath ta presente pa kontestá pregunta tokante futuro di e refineria, pero durante di e diskushon di repente e ta lanta bai, loke a kousa hopi malkontentu serka e wèlgadónan.
E kòntrakt ku PDVSA ta kaba fin di e aña aki. Kuminsamentu di aña pasá a bira konosí ku a destruí e kòntraktnan ku Guangdong Zhenrong Energy (GZE), e empresa chines ku ker a modernisá i eksplotá refineria Isla. Djaluna e kompania di gobièrnu Refineria di Kòrsou (RdK), doño di refineria Isla, a laga sa ku e negosiashonnan ku e ‘preferred bidder’ Motivá a para. Ku solamente diesun luna pa haña un eksplotadó, e intrankilidat bou di e trahadónan ta krese.
“Nos a hasi promé minister algun pregunta for di sindikato. Dos pregunta importante ku nos ke kontesta riba nan. Nos ta kere ku Clift Christiaan [presidente di e tim di proyekto multidisiplinario enkargá ku modernisashon di e refineria red.], no ta saka e mensahe pafó bon pa por sigui, i e pregunta ta keda kon e futuro di e refineria lo mustra”, asina e lider di sindikato PFWC Angelo Meyer ta bisa.
Sin krudo, sin trabou sin salario
“Despues di aprel ainda nos tin e problema ku no tin krudo pa refiná i asina no por paga nos salarionan. Awor nos ta sinti nos mes malu i esaki no ta toka nos so, sino nos famianan i tur hende na Kòrsou ku ta dependé di e refineria tambe. Nos ta masha prekupá”, asina un trahadó emoshoná ta bisa.
Un sindikalista venesolano un luna pasá a indiká kaba ku no tin krudo ta bini Kòrsou, lesa mas aki.
Un otro trahadó ta konta: “Ta masha insolente ku na un momentu krusial asina e ta djis lanta bai. Esaki ta tira un sombra riba henter e reunion. Mi no ta kere ku los ta laga esaki keda asina. Nos, e trahadónan, pero e sindikato tambe, mas bia a ekspresá nos prekupashon tokante e manera di hasi i e manera d traha di señor Christiaan por ehèmpel, sin partisipashon òf representashon di bònt den e trayekto.
Ta stroba señor Rhuggenaath ku nos ta ekspresá nos prekupashon tokante e manera di hasi di señor Christiaan. No ta un sekreto ku e promé minister ta un bon amigu i kolega di señor Christiaan. No ta pòrnada tin intrankilidat i deskonfiansa.”
Un grupo di trahadó rabiá despues di e reunion a bai Fòrti, pa eksigí e kontesta riba e dos preguntanan, pero nan no a haña promé minister mas pa papia kuné. No ta kla si e trahadónan lo wèlga mayan, pero djamars anochi lat nan tabata dilanti Fòrtí ainda.