WILLEMSTAD – E promé karga di artíkulo di ousilio for di Estádos Unídos entretantu a yega Kòrsou, ounke ku ainda no a bini aprobashon for di Venezuela. Gobièrnu di Kòrsou ta insistí riba un ekspedishon seif di e artíkulonan di ousilio pa Venezuela, sin preshon. E promé barku ku artíkulo di ousilio no por a sali djasabra for di Kòrsou.
E organisadónan di e transpòrt, Coalition Aid & Freedom, awor ta manda e barku Boneiru. Ta trata di un transpòrt privá di un kompania komersial. “Gobièrnu no tin un base legal pa taha e transpòrt, ounke e organisadónan a deklará ku e destinashon final ta Puerto Cabello na Venezuela”, asina ta pará den un mensahe di prensa di gobièrnu di Kòrsou.
Venezuela ya pa algun tempu tin Kòrsou den su gara. Despues ku a bira konosí ku Kòrsou lo bira un hub pa artíkulo di ousilio pa Venezuela, e asosiashon lokal pa interes venesolano Venex mésora a kuminsá rekoudá artíkulo. Awor ta warda e artíkulonan den un depósito, i lo parti nan ora ta posibel. Djabièrnè 500 boluntario a mèldu serka Venex pa yuda ku esaki.
E boluntarionan no ta solamente venesolano. “Bou di esnan ku a mèldu tin hende ku diferente nashonalidat. Yu di Kòrsou, hulandes, kolombiano i hende di Repúblika Dominicano. Tur hende tin kompashon ku pueblo venesolano”, asina Carlos Rivas di Venex ta bisa.
Tenshon
Na Kòrsou a lanta un diskushon si e isla mester empeñá pa hub internashonal pa artíkulo di ayudo for di Estados Unídos. Henter siman diferente sindikato, entre nan Apri i PWFC, bònt di refineria isla, ta den kombersashon ku gobièrnu. Nan tin miedu di represaya di presidente Nicolas Maduro. Entretantu Maduro a sera frontera ku e islanan, entre nan Kòrsou i e espasio aéreo, i e ta bisa ku e lo revisá e lasonan ku e islanan.
Riba e pregunta kiko venesolanonan ta haña di e entrada di Merka Mary Goiri, representante di VenEuropa, ta bisa ku “durante un akshon humanitario nos no por wak nashonalidat. Ayudo humanitario ta algu ku nos ta hasi pa hende, esei no tin nada di hasi ku nashonalidat. E hendenan na Venezuela mester di ayudo, den esaki aki nos no por distinguí for di unda e ayudo ta bini”, segun un Goiri emoshoná.
Na Venezuela e konsierto di Live Aid a kuminsá, un inisiativa di e bionario britániko Richard Branson na Cúcuta, un siudat na Colombia na frontera di Venezuela. Míles di simpatisadó a biaha bai e konsierto benéfiko pa demonstrá nan sosten kontra e desishon di Maduro ku ta tene e fronteranan será ku konsekuensha ku artíkulo di ousilio tin simannan largu kaba ta akumulá den e siudat sin por pasa frontera.
‘No mishi ku Venezuela’
Ta remarkabel ku Maduro awor ta organisando un tipo di evento paresido, un konsierto yamá: “No mishi ku Venezuela”, na e banda venesolano di e frontera ku segun e presidente por dura tres dia. Desenanan di artista a primintí kaba ku nan ta bin presentá. Segun Maduro e artíkulonan di ayudo di USAID merikano ta un apertura pa akshon militar merikano.
