WILLEMSTAD – Organisashon di biahe Corendon ta traha un risòrt grandi banda di e asina yamá Área di Ref na Otrobanda, Willemstad. P’esei gobièrnu di Kòrsou riba término kòrtiku mester kuminsá ku limpiesa di e área, kaminda tin hopi mangel ta krese.
Segun Wimbert Hato, parlamentario pa partido di koalishon MAN, limpiesa di e área no tin sentido si no trata e kousa di e problema. “Pa evitá bashamentu den e área di mangel mester renobá e instalashon di pòmp kompletamente. Mester drecha e pipanan ku ta bai Klein Hofje. For di 2018 tin bùdjèt pa esaki. Pero te dia di awe nada no a sosodé.
Spit haltu
Ku yegada di e di dos Megapier, e desaroyonan den e Área di Ref a kuminsá. Segun Caroline Härtel, manager general di e risòrt nobo di e organisashon di biahe Corendon, tur plan a kue spit haltu for di yegada di Corendon i konstrukshon di e hòspital nobo na e otro banda di kaya. Pero e limpiesa di e área ta i ta keda responsabilidat di gobièrnu lokal, Härtel ta enfatisá.
No tin plaka
Ofisina di Nashonnan Uní pa Servisio di Proyekto, UNOPS, ta insistí pa dil profundamente ku e purifikashon di awa na Kòrsou entre 2019 i 2045. Pero por lo pronto no tin plaka pa un instalashon kompletamente nobo pa purifiká awa di riol, minister di Trafiko, Transpòrt i Planifikashon Espasial, Zita Jesus-Leito ta bisa.
Hato a hasi pregunta den parlamento. “Gobièrnu a primintí ku kuminsamentu di e aña aki lo a pone un instalashon di pòmp awa nobo i ku lo bini un kontratashon pa drechamentu di e pipanan nobo.” Riba e pregunta “pakiko ta dura asina largu?” Hato no a haña reakshon ainda. E parlamentario ta premirá ku gobièrnu lo kuminsá te na delaster momento “i esei lo trese un problema grandi den Otrobanda.”
Tempu ta pèrta
Tòg Härtel tin tur konfiansa. Corendon ta forma parti di e grupo di direkshon ku a lanta pa garantisá progreso di e proyekto. Pero Hato tin ménos konfiansa. “Kabamentu di aña Corendon lo habri su portanan, hòspital nobo tambe lo habri kabamentu di e aña aki. Banda di esaki na yüni di e aña aki konstrukshon di e hotèl nobo Courtyard Marriot tambe lo kuminsá. Tur e proyektonan grandi aki mester konektá na e mésun sistema di riol. E sistema ku aktualmente ta dañá i ku ta basha direktamente den e mangelnan”, segun Hato.
HNO ta responsabel solamente pa su mes tereno
Segun Raiza Kibbelaar, bosero di hòspital, lo konektá e riol di Hòspital Nobo Otrobanda (HNO) na e sistema aktual. “HNO tin responsabilidat solamente pa e riol riba su tereno, no pa e riol kaminda ta bai konektá nos”, segun Kibbelaar.
“Pero entretantu nos ta serka di yega aprel, gobièrnu mester kuminsá awor, sino e limpiesa di awa nunka lo no ta kla na tempu pa e apertura di e hotèl di Corendon”, segun Hato. “I esei lo bira un problema grandi, pasobra niun wéspet di hotèl no tin gana di tin e molèster di holó stinki i sangura ku aktualmente ta bini for di e parke di mangel.”
30 aña di inklaridat
Trinta aña kaba tin problema ku e Área di Ref, lesa mas aki tokante tur e plannan ku a traha último añanan sin ehekutá nan.
