SCHIPHOL – E polisnan DH01 i DH02 ta bisa ku nan ‘a trata ku bon konsenshi i ku nan no a hasi nada malu’ durante e demonstrashon fatal di Mitch Henriquez na 2015. E parientenan di e defuntu no ta konvensí i e emoshonan djaluna a subi haltu durante e promé dia di apelashon ku e polisnan a entamá kontra nan kastigu.
Na 2017 a kondená e dos polisnan na un kastigu di prizòn kondishonal di seis luna pa maltrato ku morto komo resultado di e arubano Mitch Henriquez (42) na Zuiderpark na Den Haag.
E polisnan mes ta bisa ku emoshonalmente nan ta sufri hopi bou di loke a pasa i ku nan tin problema pa rebibá loke ku a pasa. “Mentira so”, primu Alexandro Dijkhof ta bisa na nòmber di e famia, despues di e seshon.
Maria Henriquez – mama di Mitch Henriquez – tampoko no ta konvensí. “Atrobe nan ta keda bira di tur banda i gaña”, e ta bisa emoshoná. Dilanti kámara ainda Maria no ke reakshoná: Ta muchu pisá i mi no por ainda”, e ta bisa bou di yoramentu. Djárason tin oportunidat pa e parientenan di e defuntu bisa algu, e mama ta kontemplá di hasi uso di esaki.
E polisnan ta bisa ku nan tin trouma
E dos polisnan ku no opstante un petishon di e parientenan di e defuntu, ta keda anónimo bou di e nòmbernan DH01 i DH02, djaluna a bisa kiko nan ta sinti. “”Den mi sintimentu mi tin tres aña kaba den un prizòn i m ta haña ku ta teribel pa tur hende”polis DH01 ta bisa wes. Tur dos ta bisa ku nan ta sufri tambe di afektashon di strès pòsttroumátiko (PTSS) pa motibu di e eksperensia.
Parientenan di e defuntu ke kastigu mas haltu
Kaminda e polisnan ku e apelashon ta spera ku lo kita nan kastigu, e parientenan di e defuntu ta spera riba un kastigu mas haltu. E parientenan mes no por apelá pasobra nan no ta partido ofisial.
Pa e apelashon den e kaso Mitch Henriquez Korte ta tuma kasi dos siman. Djárason 3 di aprel e parientenan ta haña derechi di papia. Djárason 19 di yüni wes ta duna sentensia.
