SCHIPHOL – “Mi no ta komprondé kon e polisnan ta sali ku asina tiki kastigu pa morto di mi ruman.” E mama, ruman muhénan i èks amiga di Mitch Henriquez ta papia djárason durante e seshon di e korte ku seguridat èkstra.
E derechi di papia di e parientenan di defuntu ta un parti di e apelashon ku e polisnan DH01 i DH02 a entamá kontra nan kastigu. Na 2017 a sentensia e dos polisnan na un kastigu di prizòn kondishonal di seis luna pa maltrato ku morto komo resultado di e arubano Mitch Henriquez (42) na Zuiderpark na Den Haag.
Ruman muhé Lila Henriquez: “Pakiko apelashon”
E ruman muhé mayó Lila Henriquez, ta papia komo promé. “Mi a duda largu tempu si mi ker a papia i si lo mi tabata por, e ta konta. “Mi salú a bai atras i ta tristu ku mi no ta rekonosé mi mes mas” E tin hopi pregunta: “E polisnan a apelá, pakiko? Ata nan por traha ainda di VOG (Deklarashon tokante kondukta)?”
Mama Maria Henriquez: ‘Pakiko OM no ta persiguí mas severo?’
Mesko ku su yu muhé mayo Maria Henriquez, mama di Mitch, a keda ku hopi pregunta. “Kada bia mi ta puntra mi mes si tabatin mas kos ku a sosodé den e bùs. Pasobra si mi mira e estado ku mi yu hòmber tabata aden, tur na sla i ku herida, mi ta kuminsá duda di bèrdè mes si ta na e tereno di e festival so nan a batié.” Tambe Maria Henriquez ta puntra su mes ‘pakiko OM no ta persiguí e negligensia di e polisnan ku tur forsa di lei’.
Ruman muhé Germaine Henriquez: ‘Ken ta laga e polisnan sinti nan mes menasa?’
Germaine Henriquez, e ruman mas chikí di Mitch tambe ta hasi uso di su derechi di papia. E último dianan aki vários bia el a basha yoramentu den korte i sali bai. E no por pensa riba pordon: ‘Pa mi parti nan sera nan i tira e yabi afó.’
Èks amiga Jennifer Petrocthi: ‘Nos yunan tur tin trouma’
Finalmente e èks amiga i mama di e dos yunan di Mitch, Jennifer Petrocthi, ta papia: E ta basha yoramentu ora e papia tokante e impakto di morto di Mitch riba nan yu hòmber (16), ku tin un hèndikèp mental. “E tabatin 12 aña ora su tata a fayesé i te dia djawe e ta den terapia pasobra e ta hasi su mes daño i e tin miedu.”
Si ta na e parientenan di e defuntu nan lo ke pa e kaso sera lihé. E famia ta preferá di mira ku e kastigu ku e polisnan lo haña keda meskos òf bira mas haltu. “Mester duna un señal ku asina no por”, abogado Gerald Roethof djaluna kaba a bisa Ret Karibense.
Impakto di e deklarashonnan di e parientenan
E abogado ta ferwagt ku ‘korte lo tuma e deklarashonnan di e parientenan tambe na konsiderashon den e apelashon ora realisá e impakto di e kaso aki”.
E polisnan DH01 i DH02, ku ta sinta separá den un otro parti di korte ta bisa ku nan tin kompashon ku e parientenan, pero mas ku esei nan no ke bisa. “E kos ta basta teribel kaba pa nan”, un di e polisnan ta bisa.
Pa e apelashon den e kaso di Mitch Henriquez wes ta tuma kasi dos siman. Djarason 19 di yüni wes ta sentensiá. Otro siman Ret Karibense ta reportá e defensa di e dos polisnan.
