WILLEMSTAD – Studiantenan lokal ketu bai ta interesá pa bai Rotterdam. Esaki apesar di e konfushon na komienso dje aña aki ku supuestamente studiantenan kurasoleño i arubiano no tabata bonbiní mas na Hogeschool Rotterdam debi na mal resultado.
Un total di 246 studiante for di e islanan karibense a registrá na Hogeschool Rotterdam di kual 135 studiante di Kòrsou. Marja Bakker di Hogeschool Rotterdam, ta bisa ku después di un inventario por konkluí ku tin kasi mésun kantidat di studiante ku a mèldu kompará ku añanan anterior.
Meskos ta konta pa e kantidat di partisipantenan na e trayekto di preparashon Subi Jet pa bo Get renobá pa studiantenan ku ta bai Hogeschool Rotterdam for di Kòrsou.
“Pues nos no ta mira ningun diferensha, no opstante e konfushon ku tabatin”, Bakker ta bisa. Mester remarká ku ta trata di aplikashonnan i ku e studiantenan por disidí pa skoge otro òf nan por faya pa nan éksamen, Bakker ta enfoká.
Stichting Studie Financiering Curacao (SSC) ta konfirmando meskos. No a kambia mucho den e kantidat bayendo Rotterdam, asina Juliette Mendez ta bisa.
Jealaine Alexander di My Future Career
Ménos ‘free movers’ ta bai
Sinembargo, My Future Career, un organisashon ku ta prepará i guia studiantenan sin un beka, sí ta konstatá un bahada di e kantidat di asina yamá ‘free movers’ ku ta bai Hulanda i Rotterdam en partikular.
E konsternashon tokante di studiantenan karibense na komienso di aña, pero tambe mas faktor ta kontribui na esaki, segun Jealaine Alexander di e organisashon.
Jealaine Alexander di My Future Career
Alexander tin e imprenshon ku tin un grupo grandi di studiante ku a wanta un ratu pa sigui studia. Loke ku ta indika ku e asina yamá ‘gap year’, ta birando mas grandi. E studiantenan aki ainda no sa kiko nan ke studia i ta falta informashon.
Un otro motibu di e bahada di interes pa Hulanda, por ta e situashon ekonómiko, e ta bisa. Esta ku e situashon no ta duna e mayornan sufisiente garantia di trabou ku nan por finansia estudio di nan yu den eksterior, asina Alexander ta splika.
|
