ORANJESTAD/WILLEMSTAD – Ady Thijsen, presidente di parlamento di Aruba, no ta haya cu mester a pone hopi awa na biña pa logra Tweede Kamer vota pa su amienda riba e Rijkswet Koninkrijksgeschillen (ley pa conflicto den Reino). “Nos no por a bisa si: tur cos of nada. Sino nos lo a cay bek den e mesun situacion di 10 aña pasa.” E ta pone su speransa awor den Eerste Kamer.
Den su amienda nobo adapta lo propone pa un seccion apart pa trata conflictonan di e paisnan den Reino. E seccion aki lo mester haya su cas na Raad van State na Hulanda. Mester investiga ainda si esaki ta posibel. Sinembargo mayoria di Tweede Kamer a vota pa e amienda-Thijsen aki pa adapta e concepto di ley (Rijkswet) cual ta un proposicion di secretario di estado Hulandes Raymond Knops.
Presidente di parlamento di Aruba, Ady Thijsen
Pero prome e votamento, Thijsen mester a adapta su amienda riba e condicion principal: esta e parti cu e areglo lo ta uno cu ta mara tur pais, Hulanda tambe. Pero Hulanda ainda no ta di acuerdo y asina esaki a keda afo di e amienda finalmente pa no perde sosten di e parlamentarionan Hulandes. Thijsen ta admiti cu no tin suficiente sosten ainda den parlamento Hulandes pa un areglo obligatorio. Pero nan ta keda bringa pa esaki.
Despues di e receso Tweede Kamer lo vota riba e ley y despues ta Eerste Kamer su turno pa trata e Rijkswet. “Eerste Kamer por bisa ainda cu e ley aki no ta cuadra cu e intencion. Pues nos tin un chens ainda cu nan lo manda e ley bek Tweede Kamer. Y asina nos por bringa pa nos derechonan atrobe y haya rason”, Thijsen ta bisa.
Segun e, e ley di Knops no ta cuadra cu articulo 12a di Statuut (constitucion) di Reino. “Locual expertonan tambe ta bisa.”
Parlamentario di Corsou Giselle MC William
‘Niun sosten’
E parlamento di Corsou tambe a rechasa e ley di Knops. Parlamentario Giselle MC William, kende ya a denuncia e ley aki den Tweede Kamer siman pas, ta bisa cu tin niun sosten. “Mientrastanto esey mester tin, sosten, ora di actua den spirito di e Statuut di Reino. Pero den Tweede Kamer ni den Eerste Kamer nos por vota. Asina nos ta spera cu Eerste Kamer lo duna prioridad na nan sentido di boga pa derechonan y spirito democratico”, Mc William ta bisa.
Un delegacion di Aruba, Corsou y Sint-Maarten ya a biaha pa Den Haag na april pa enfatisa cu nan ta bay di acuerdo solamente ora tin un proposicion riba mesa den acuerdo cu tur partido di esun na 2015. E proposicion ey tabata menciona un organo independiente unda e veredictonan ta mara e paisnan na e interpretacion huridico di e Statuut.
Mc William tabata positive na e moment ey, pero awor no mas. “Politica ta keda politica y Den Haag ta keda Den Haag ora ta trata di nos islanan.”
