DEN HAAG – CDA i VVD ta insistí pa intervení den gobièrnu di Sint Maarten. E dos partidonan di gobièrnu ta ‘masha prekupá’ pa e reedifikashon awor ku gabinete a kai atrobe.
E echo ku reedifikashon ta retrasá pa motibu di e impase polítiko na e isla, ta frustra CDA i VVD. Tin miónes ta warda pa usa, pero aparentemente na Sint Maarten nan no por invertí esaki den e interes kolektivo.”
“Mi ta haña masha grave di mira kon hende ta bai atras i ku mi no por hasi nada”. Van Dam ta bisa. “Mi ta haña ku komo parlamentario hulandes – sigur den direkshon di Konseho di Minister di Reino – mi mester tuma mi responsabilidat.”
Pregunta den Kamer tokante e posibilidatnan di intervení
CDA i VVD konkretamente ke sa di sekretario di estado Raymond Knops (Relashonnan den Reino) ki posibilidat tin pa intervení den gobièrnu for di Den Haag.
“Mi ta masha prekupá pa e reedifikashon”, e miembro di Kamer di VVD Andre Bosman ta bisa. Segun Bosman di tur manera ta tempu pa Konseho di Minister di Reino ’buta preshon tur ku tin’.
Spich di Marlin-Romeo ta impreshoná Den Haag
E promé minister ku entretantu a bira demishonario Leona Marlin Romeo djaluna a tene un spich na televishon, kaminda e ta proklamá elekshon nobo despues ku diferente parlamentario a baha na awa ku nan asiento.
Marlin-Romeo a ekspresá diferente akusashon kontra parlamentario. Gabinete entre otro lo ta traha den un ‘kultura di miedu’ i for di den parlamento tabata animá pa violá konstitushon. Segun e tin ‘hende ku influensha pafó di parlamento ku bon mirá ta manda’.
E miembro di Kamer di CDA Chris van Dam ta bisa ku e ta hopi di shòk pa e spich di Marlin-Romeo. “Si un promé minister pone tur e kosnan aki banda di otro i den sierto sentido ta konfirmá sospecho i redu, mi no por sera mi oreanan pa esaki.”
Prekupashon pa elekshon
Riba 25 di novèmber Sint Maarten ta bai urna atrobe. “Mi ta prekupá pa elekshon”, Van Dam (CDA) ta bisa. “Pasobra ken aktualmente por hasi loke ta bon pa Sint Maarten? Ku nuebe gabinete den dies aña esaki tin mi masha prekupá.
Intervení manera na Sint Eustatius?
CDA abiertamente ta pro e tumamentu ofer di gobièrnu, komparabel ku e manera ku esaki a sosodé na Sint Eustatius. Den Haag a hala gobièrnu lokal pone un banda na febrüari di 2018, despues ku un komishon a konkluí ku e munisipio ekstraordinario no tabata tuma lei na serio.
“Mi ta kere esaki a yuda Statia masha hopi pa bai mas dilanti komo pais”, Van Dam ta bisa. “Mi no sa kiko ta posibel den Reino pa un pais separá”,pero sí mi ta haña ku a bira tempu pa investigá esaki.”
Intervení manera na Sint Eustatius ‘por ta un opshon’, e parlamentario hulandes di VVD André Bosman, ku huntu ku CDA a entregá pregunta na Kamer, ta haña. “Mi no ta ekskluí nada.”
