WILLEMSTAD – Na Kòrsou San Nicolas i su Pietnan ta nabegá drenta Annabaai riba 16 di novèmber. Ya pa añanan su Zwarte Pietnan tin kompaño di algun Piet di diferente koló, pero e kolo pretu ta keda dominá. “Loke Hulanda ta hasi ku e koló di Piet bèrdaderamente no ta importá nos”, Solange Trinidad di Fundashon pa nos Muchanan (e organisashon tras di e entrada grandioso) ta bisa.
NTR e aña aki tin solamente Piet shushá ku rut. Un gran parti di e munisipionan hulandes ta sigui e ehèmpel aki i ei Zwarte Piet ta manera disparsé poko poko. Na Aruba i Boneiru kasi niun hende no tin kunes: e aña aki atrobe e Pietnan ta pretu. I na Kòrsou? “Loke NTR ta hasi no ta importá nos”, Trinidad ta bisa.
‘Diskriminashon no ta masha kos aki’
Trinidad ademas ta enfatisá ku diskriminashon no ta hunga un papel grandi na Kòrsou. Na Hulanda segun e ta diskriminá hende koló skur masha hopi mes i diariamente antiano ta haña nan konfrontá ku esaki.
Demonstrashon na kaminda
Último añanan tabatin protesta chikí rònt di e yegada di Zwarte Piet. E aña aki Naomie Pieter ta na Kòrsou, un di e miembronan prominente di e grupo di protesta hulandes Kick Out Zwarte Piet. “En bèrdat nos ta preparando un demonstrashon”, Pieter ta splika.
Hende ta ninga nan raisnan
E idea ku no tin diskriminashon na Kòrsou, kasi ta pone Pieter hari. “Un hende koló skur ku ta pinta su kara pretu pasobra e ta kere ku e no ta pretu, òf e no ke ta? Esei ta grave. Hende ta ninga nan raisnan afrikano, nan kolo, i ta nèt esaki ta e problema.”
Pieter su meta ta pa konsientisá e Yu di Kòrsou di e karakter kolonial di Zwarte Piet. Segun e no ta bai pa Piet mes, pero pa e totalidat di tin rèspèt pa bo mes i pa konosé bo pasado. “Trinta di Mei tampoko no tabata trata di sèn: tabata trata di rèspèt, dignidat i igualdat. Den e lucha kontra Zwarte Piet tambe ta trata di esaki.”
