KRALENDIJK – Esther Bernabela, miembro di partido koalishon UPB den Konseho Insular i dòkter na Boneiro, lo trese pregunta djárason aki pa Konseho Insular tokante e akuerdo di prevenshon ku a firma den 2019. E ke boga pa tin sifra ofishal tokante mal uzo di alkohòl i mas kòntròl riba kantidat di establesimentu ku ta bende alkohòl pa desmui e konsekuenshanan negativo ku mal uzo di alkohòl tin riba nos poblashon.
E impakto ku mal uzo di alkohòl tin riba e uzadó, su famia i komunidat kompleto ta grandi, segun Bernabela. Aunke no tin sifra ofishal nos por bisa ku seguridat ku uzo di alkohòl hopi bia ta faktor ku ta kondusí na vários problema sosial i hudisial.
“E efekto di alkoholismo ta devastador pa espesialmente e parti di poblashon di ménos rekurso”, e ta bisa.
Hòmbernan sinta na snèk durante dianan di fiesta no ta un bista inkomun pa Boneiru. Di Rincon te Tera Kòra, den kada bario tin diferente snèk ku ta bishitá ku regularidat. Di konsumo di alkohòl te un partido di dominó, ta posibel na snèk.
Pa hopi hòmber lokal bishitá un snèk ta un kustumber diario. Meskos pa señor H.E. (58 aña):” Na snèk mi ta distraí. Topa mi konosínan i tende loke ta pasa den bario.”
Riba e pregunta kuantu bebida alkohóliko e ta konsumí durante su bishita na snèk E. ta bisa bastante. “Pero esaki no ta un problema. Mi ta bebe ora mi tin sèn. Si sèn kaba mi ta bai kas bai drumi.”
No tin restrikshon
Segun Bernabela e promé kos ku nos tin ku hasi ta rekonosé ku tin un problema.
Esther Bernabela – portrèt: Nathaly Evertsz-Ipcedencia
“Uzo di alkohòl ta sosialmente aseptá. Hopi di nos kustumbernan ta involukrá alkohòl. Parse ku no por tin selebrashon sin bebida alkohóliko. Asta fiesta di mucha tin e biña òf serbes pa e adultonan presente.”
“Tambe por mira e resultado di un merkado liber. Na kada skina di hanchi tin un snèk, no tin niun klase di restrikshon.” Bernabela ta haña ku na kada snèk mester tin un bòrchi ku ta prohibí benta i konsumo di alkohòl na menor di edat.
Énfasis riba konsientisashon.
“Nos no por papia di un problema grandi, paso no tin un investigashon resien ni sifranan ofishal”, segun Christine Alvarez di Mental Health Caribean (MHC). Den mesun rosea e ta bisa ku e uzo di alkohòl bou di hóben ta alarmante. Espesialmente e echo ku e hóben ta kuminsá eksperimentá ku alkohòl na un edat basta yòn i ku bebida stèrki.
Christine Alvarez ta sigui menshoná ku mester pone mas énfasis riba konsientisashon. Den pasado e tabata enkargá ku un kampaña di prevenshon i konsientisashon den kual el a bishitá diferente skol básiko i skol sekundario. Di e manera aki el a alkansá hóben i mayor. Pero awor e tarea aki ta den man di Entidat Públiko Boneiru (EPB).
E ta splika ku Mental Health Caribbean ta ofresé tratamentu pa alkoholismo. E kliente mester bai su dòkter di kas i pidi un karta di referensha i ku esaki e por mèldu na MHC. E tratamentu ta básikamente ambulante i ta involukrá e famia kompletu den e proseso pa rekuperashon.
Responsabilidat di Gobiernu
“Gobièrnu tin responsabilidat pa ku pueblo su salubridat. Den e kuadro aki naturalmente ta tarea di Gobièrnu pa pone medionan disponibel pa prevenshon i konsientisashon di uzo di alkohòl. Band’i esaki Gobièrnu mester bini ku un maneho pa medidanan i restrikshon di e kantidat di snèk”, Bernabela ta bisa