ORANJESTAD – Gobierno Arubano ta bini cu un solucion temporario tras di otro pa Aruba su dump di sushi di mas grandi Parkietenbos cu ta haci habitantenan den cercania malo. Pero e habitantenan ta keha cu nan no ta bira miho di esaki, sino hasta mas malo.
E fundacion Parkietenbos di un grupo di ciudadano preocupa ta tene un accion di firma. “Nos no ke solamente pa cera e dump (bieu) di Parkietenbos. Sino tambe di e dump nobo Ser’i Teishi”, presidente Edith Koolman-Tromp y vocero Aldrich Croes ta bisa.
Ser’i Teish, e dump nobo
E bashamento di sushi riba e cero di Ser’i Teishi a bini na 2018 pa alivia e dump di Parkietenbos. Entretanto a dera cien mil ton, e gerente Serlimar (compania di gobierno) ta bisa. Ta separa e sushi y hink’e den bulto di plastic pa despues der’e. Habitantenan den besindario entretanto ta keha di ‘un holo di gas’ cu ta trece dolor di cabes, kimamento di wowo y problema di respiracion. Kiermen esaki ta bini riba e molester cu nan ta experencia añanan largo caba di Parkietenbos.
Awor Serlimar a contracta experto pa investiga e molester di Ser’i Teishi. Pero e minister responsabel Otmar Oduber a admiti caba cu nan a lubida di pone pipa pa saca aire. Ademas e dump nobo a bini sin permiso di molester, y cu esaki gobierno mes ta viola ley. Pa e habitantenan esaki kiermen cu e molester por sigui sin limite.
Anto esaki mientras cu e siguiente solucion ‘interino’ ta presenta su mes caba: Serlimar otro siman kier cuminsa uza un kimado chiquito di sushi pa den dje kima entre otro sushi medico.
“Pakico e kimado di sushi ey ta bin para aki atrobe? Mi famia y ami ta malo caba di e dump di Parkietenbos y despues Ser’i Teishi. Anto awor pega aki nan kier bay kima sushi medico. Esaki por ta radioactivo tambe. Berdaderamente mi tin masha miedo”, habitante Anouk Balentina ta bisa.
Ministernan ta duna informacion robes
Pa e kimado di sushi aki tampoco no a duna un permiso di molester. Minister Otmar Oduber a bisa cu gobierno no tin nodi di pidi permiso pasobra ta e mes ta doño. Pero esaki no ta corecto. E ministernan envolvi mas biaha sa duna informacion robes. Manera poco tempo ey minister di Salubridad Publico Dangui Oduber.
Minister di Salud, Dangui Oduber – potret: Sharina Henriquez
Riba e preguntanan ki dia porfin e ta cuminsa un investigacion di e salud di e habitantenan, e minister ta bisa: “Te aworaki ta un keho oficial so a drenta na Salubridad Publico di un famia, awor nos ta bay investiga esey. Sigur nos lo investiga e besindario tambe pa haya sa kico ta e consecuencianan di e dump.”
Pero parce tin hopi mas keho na Departamento di Salud Publico. No a haci nada cu esakinan.
Ademas e minister for di aña pasa november a haya e conseho di su departamento tocante e keho di e famia ey caminda nan a haci un bishita na cas e ora ei. No a examina e famia medicamente e ora ey, pero nan mester a contesta un lista di pregunta. Salubridad Publico den e mesun luna a notifica nan tambe cu nan no por haci nada mas y cu e cos ta den man di otro instancia di gobierno. Kiermen no tin cuestion di niun investigacion na gran escala.
Habitantenan ta bisa cu nan a bira malo di e dump – potret: Sharina Henriquez
Habitante Balentina ta bon conosi cu e wega di ‘tira hende di un punta na otro’. “Ayera atrobe nos a mira un candela grandi na e dump, ku explocionnan enorme.”Mi yiunan tabatin miedo y ami tambe. Pero e di mas pio ta e huma, e ta pasa den airco drenta paden y mi yiunan tin asma caba. Mi a yama e number di alarma pero e homber ey a papia cu mi masha fresco y a bisa cu brandweer no ta bini toch pasobra tin un acuerdo cu e manager di e dump tocante di esaki. Y cu mi mester yama Bikker (minister di Husticia Andin Bikker) si mi no gusta.”
Awe Balentina a bay Ministerio Publico pasobra riba 25 di november di aña pasa el a haci denuncia di entre otro daño corporal severo cu culpabilidad. “Prome minister mes a bisa cu e dump ta un peliger grandi pa salud di e habitantenan den cercania. Pero niun hende no ta haci nada pa proteha nos.”
Te awe e no a haya contesta no opstante diferente peticion na fiscal mayor. Ademas polis no ke acepta su keho.
‘Nos ta bini solamente si e candelanan ta muchu grandi pa Serlimar mes paga nan’- comandante di brandweer Edward de Cuba
Candela na dump Parkietenbos – potret: Anouk Balentina
Investigacion cerka brandweer pakico nan no a bini ayeranochi ta trece lo siguiente: “Nos ta bini solamente si Serlimar (gerente di e dump) mes indica cu nan mester di asistencia. Kiermen solamente si e candelanan ta mucha grandi y nan bisa cu nan no por handel nan nan so. En berdad nos a palabra esaki, pasobra nos autonan di brandweer tabata sufri hopi daño ora nos subi e dump. Ademas no por paga e candelanan cu awa, solamente cu tapamento cu santo. Esaki Serlimar mes tambe por”, segun comandante di brandweer Edward de Cuba.
Riba e pregunta con nan ta proteha habitantenan den besindario contra e efectonan, el a contesta: “No tin sentido pa cada biaha evacua nan. Pasobra nan mester bay bek toch atrobe. E dump ta un problema masha grandi. Esey nos no por soluciona.”