NIEUWEGEIN – Tishelle Daniel di Sint-Maarten ta oftalmólogo (dòkter di wowo) básiko ora e krísis di corona yega Hulanda. Tres dia e ta pensa pa bai yuda na Intensive Care. Riba su di dos dia kaba e ta hañ’é ta pone un pashènt defuntu ‘masha hóben’ riba un brankar, na kaminda pa mortuario.
“Ta masha pisá. Den oftalmologia bo ta hasi un tratamentu i e hendenan ta bai kas. Pero na e departamento di IC kaminda mi ta traha, na Sint Anthoniusziekenhuis na Nieuwegein, hende ta muri òf ta keda den koma simannan largu. Ainda mi ta mira masha poko relato positivo”, Daniel ta bisa.
E ta suspirá. “Mi ta haña fèrfelu pa tin pashènt ku mi no por papia kuné. Nos ta yama ku vidio hopi ku famia pero kiko mi por bisa? Mi no sa nada di nan famia.”
Trabou impaktante
Daniel tin dos siman i mei ta traha na IC. Komo médiko básiko e ta traha komo ‘buddy’ di un enfermero di IC. Miéntras ku e ta haña ku ta masha impaktante, e no ta pensa di stòp. “Esaki ta ken mi ta. Mi mester hasi esaki.”
Tishelle tin asma. Tòg el a skohe pa traha ku pashènt ku COVID-19
Daniel tin asma, pero e no ta sinti ku e ta kore mas riesgo. “Nos tin sufisiente medio di protekshon. Mi ta sinti mi mas seif na trabou ku den supermerkado.
Hopi prekupashon pa Sint-Maarten
Loke e ta prekupá p’e mas tantu ta su famia na Sint-Maarten. E isla tin mas morto relatá na COVID-19 di tur e islanan te aworakí. Nuebe morto, 68 hende a tèst positivo i sentenar ku síntoma. E isla ta den un lockdown kompleto i asta supermerkadonan tabata será un temporada.
Si mi mira kon yen e IC ta aki, i sabiendo kon chikí e kapasidat di Sint-Maarten ta, mi ta hopi prekupá. Ku e enfermedat aki hende ta bai atras masha lihé. Esaki Sint-Maarten Medical Center no por hèndel.
Daniel ta sekretario di e Asosiashon di Médiko di Antia (AMA). E asosiashon a apelá na personal karibense den kuido ku ke yuda na e islanan. A drenta mas o ménos 80 inskripshon. E mes lo tin gana di bai Sint-Maarten. “E petishon ta berdaderamente pa enfermero di IC i médiko di IC. Pero si e nesesidat ta grandi mester di tur hende, i mi ta bai mésora.”
Tres bia mas tantu ayudo nesesario
E médiko ta haña ku gobièrnu hulandes ainda ta hasi muchu poko pa Islariba. “Promé nan ker a manda tres kama di IC pa Sint Maarten. Pero Sint Maarten ta responsabel tambe pa ayudo médiko pa Saba i Sint-Eustatius. Ke men nos mester di tres bia mas ayudo.
No opstante e preshon di trabou i prekupashon pa famia i amigu den karibe, Daniel por keda positivo. “Mi famia ta salú, ami ta salú i mi tin trabou. Riba mi dianan liber, mi no tin nodi di ta produktivo. Mi a duna mi mes pèrmit di hasi nada un ratu.”
 Tishelle Daniel Tishelle a nase i lanta na Sint-Maarten i ku 18 aña a bai Hulanda pa studia medisina básiko na Vrije Universiteit Amsterdam. Na 2017 el a haña su Master i awor e ta médiko básiko oftalmologia na tur sitio di St. Anthonius Ziekenhuis. For di e aña aki e ta sekretario di e Asosiashon di Médiko di Antia. Su prioridat di mas grandi ta pa oumentá e lugánan pa studia pa médiko hóben na e islanan. |
Henter e siman aki Ret Karibense ta pone atenshon na heroé karibense den kuido durante e krísis di Corona.
| Pa keda na altura di e desaroyonan na e islanan i di polítika na Den Haag? Aboná meskos ku otro lesado riba e karta grátis semanal di notisia. |
