ORANJESTAD – Aruba, Kòrsou i Sint-Maarten mester koperá ku otro mihó i tambe ku Hulanda pa por kombatí e enfermedatnan di infekshon mihó. Pasobra ‘e kapasidat di e kombatimentu ta strukturalmente insufisiente na òrdu i vulnerabel pa motibu di e grandura di eskala di e paisnan aki’.
Esei e krísis di corona aktual atrobe ta demonstrá, segun e Instituto di Reino pa Salubridat Públiko i Medio Ambiente (RIVM, Rijksinstituut voor Volksgezondheid en Milieu). “Ta hopi mas largu kaba nos ta insistí serka e paisnan pa oumentá e kapasidat di kombatimentu di enfermedat di infekshon. Lástimamente ku eksepshon di un krísis asina, esaki tin tiki atenshon polítiko i prioridat.”
Pakiko e islanan ta trata corona diferente di otro?
RIVM ta konsehá e islanan den e trato di e kombatimentu di corona. Esaki ta sosodé segun nan na e mes manera i ku e mes konsiderashonnan. Pero Aruba, Kòrsou i Sint-Maarten despues mes ta determiná kiko nan ta hasi ku e konseho aki. “Ku e maneho aki banda di konsiderashon sientífiko, argumento polítiko i tumamentu di desishon tambe ta hunga un papel.” Espesialmente e argumentonan polítiko i desishonnan por hunga un papel den e diferenshanan di enfoke di e islanan, segun RIVM.
Na Aruba a tèst mas hende ku na Kòrsou. Sint-Maarten a desviá pasobra no tabatin kapasidat pa tèst den kuminsamentu di e krísis. Tambe e medidanan ku e gobièrnunan lokal ta tuma pa kombatí e plamamentu di e vírùs di corona ta diferente.
Asina Sint-Maarten masha lihé a sera frontera ku Estádos Unídos for di kua mayoria di e turistanan tabata bini e isla. Aruba meskos ku Kòrsou a sera frontera ku Oropa, pero no ku Merka, miéntras ku ta djei e mayoria di su turista tabata bini. Kaba e promé kasonan di di infekshon na e isla a bini di Merka. E ora ei Aruba komo promé di e islanan a bini ku un seri di medida pa fòrsa hende pa keda paden, manera toke de keda i den dia shelter-in-place.
Pakiko esun isla tin mas kaso i e otro mas morto?
E sifranan ofisial di e islanan ainda ta mustra diferensia grandi. Aruba ta kana dilanti ku 101 kaso. Sint-Maarten tin 76 kaso i Kòrsou tin 16 kaso positivo.. Pero Sint-Maarten tin e kantidat di mas grandi di morto (15) siguí pa Aruba ku tres morto i Kòrsou ku u nmorto di corona te awor.
Un splikashon pa e diferenshanan aki no tin. Segun RIVM pa detektá i kombatí epidemia manera corona ta un asuntu kompliká. Kaminda un parti di e desaroyonan ta ‘dependiente tambe di kasualidat i tin bia di mal suèltu.’
Pakiko Sint Maarten ta haña ayudo èkstra?
E isla ku mas morto di corona (Sint-Maarten) den e área hulandes karibense ta haña ayudo èkstra di Hulanda. Esaki pasobra di tur isla e tin e kapasidat di mas chikí, RIVM ta bisa, pa por kombatí e krísis ‘responsablemente’.
“Sint-Maarten ta un situashon kompliká ku dos pais riba un isla. Esaki ta hasi kordinashon internashonal nesesario.” Ku e plamamentu rápido di e epidemia di corona ei, Hulanda a manda personal tambe pa yuda ei.
