DEN HAAG –Tweede Kamer ta prekupá pa e intrankilidat sosial, pegamentu di kandela i protestanan na Kòrsou. D66 i GroenLinks ke pa sekretario di Estado Knops (Relashonnan den Reino bai yuda tres trankilidat bèk.
E konsekuenshanan ekonómiko di e pandemia corona ta pone míles di hende pèrdè trabou na e isla. Tin di nan tin kuater luna kaba sin entrada, miéntras tabata e intenshon ku nan por a haña un kompensashon.
Kòrsou i Hulanda mester kana huntu
E protestadónan a eksihí elekshon nobo i e atmósfera na e islanan ta menasante. D66 i GroenLinks ta haña ku Hulanda tambe tin un ròl pa laga sosiegu bini bèk. Kuminsamentu di otro siman nan ke un debate ku sekretario di estado Knops.
Antje Diertens (D66)
E isla apénas tin sèn den kaha i p’esei ta haña fiansa di emergensia di Hulanda. Un kondishon di Hulanda Ta ku tur ámtenar mester entregá 12,5 porshento di nan salario. Ku asta hende ku tabata pasa trabou kaba tambe mester entregá, D66 i GroenLinks ta haña inaseptabel.
“Un polis, enfermera òf un hende ku ta bai ku shushi, ta hende ku no ta gana masha sèn”, segun miembro di Kamer Antje Diertens. “E ora ei ta bira mas pió. Mester bini mas trabou na midí. Kon nos ta bai sòru pa yuda e hendenan normal?
‘Kòrsou í Hulanda ta responsabel’
Tantu Kòrsou komo Hulanda ta responsabel pa yuda ‘hende vulnerabel promé’, miembro di Kamer di GroenLinks Nevin Özütok ta haña. “Si tin nesesidat mester yuda otro den Reino. E prekupashonnan pa siguridat di eksistensia ta masha grandi.
Kamerlid Nevin Özütok (GroenLinks)
“Mi ta prekupá ku e spiral di violensia lo subi mas aleu”, segun Özütok. Nos no mester bai bèk na e imágennan di añanan sesenta.”
’Na Hulanda tambe e nesesidat ta grandi’
E miembro di Kamer Chris van Dam di CDA tambe ta sigui e ‘situashon difísil na Kòrsou’ rònt di e protestanan i kimamentunan ku hopi atenshon. “Na Hulanda tambe e nesesidat ta haltu den e sentido finansiero i sosial. Djadumingu pasá Mobiele Eenheid mester a para bochincha ku forsa.
Chris van Dam (CDA)
E kondishonnan segun CDA ta hustu. “Nos ta wak i hasi loke ta nesesario, pero nos sa di otro ku Kòrsou tin e responsabilidat di kuida su mes. Ke men no ta sèn grátis.”
‘Bai vakashon na e islanan!’
E miembro di Kamer di CDA Van Dam ta hasi un yamada na tur hende na Hulanda pa sostené ekonomia di e islanan pa bai ei pa vakashon. “Si Hulanda ke bai di vakashon, e ora ei ta un destinashon so ta real: e parti karibense di Reino. Laga nos bai saka nos sèn di fakansi ei bou.
