WILLEMSTAD – Diferente hóben polítiko kier partisipá n’e próksimo elekshon pa parlamento ku ta planiá pa 2021. Kiko ta nan vishon pa kon Kòrsou mester atendé ku e krísis ku a surgi dor di Covid-19?
Ret Karibense a puntra e tres hóbennan polítiko Yael Plet (parlamentario pa MAN), Gwendell Mercelina (aspirante kandidato lista PNP) i Danny Ruiter (ainda sin partido ofishal). Nan opinion ta diversifiká.
Yael Plet
Sigun parlamentario aktual Yael Plet (MAN) mester ta kouteloso ku e pakete ku Den Haag ta ofresiendo gobièrnu. “E invershon ku Hulanda ta dispuesto pa hasi den Kòrsou, por resultá den un barí sin bòm den e kaso ku destiná e sèn solamente pa proyektonan ekonómiko. Ignorá e aspekto sosial, lo nifiká ku e sèn ta bai pèrdí.”
Parlamentario Yael Plet ta splika kiko por salba Kòrsou
“Nos tin un défisit demokrátiko”, Plet ta enfatisá. P’esei e parlamentario hóben ta konvensí ku mester hasi tur loke ta posibel pa e outonomía ku Kòrsou tin, no bira ménos.
Plet ta mustra entre otro riba e echo ku falta un ‘Areglo di Disputa’, asina ku Kòrsou lo por bringa hurídikamente kontra un desishon ku Den Haag tuma tokante e isla.
Tambe e forma kon Konseho di Minister di Reino ta tratando Kòrsou aktualmente ta algu ku parlamentario pa MAN ta lamentá profundamente. Sekretario di Estado Raymond Knops ‘ta pone kuchú na nos garganta’, sigun Plet.
Gwendell Mercelina ta kombersá ku Dulce Koopman
Un otro hóben polítiko ta Gwendell Mercelina. Kasi el logra un asiento n’e elekshon anterior. E ta asombrà kon Hulanda ta tratando Kòrsou. Sekretario di Estado mester kuminsá ‘kòrda riba su ideologia Kristian demókrata’, t’e konseho ku Mercelina kier dun’é.
Gwendell Mercelina
“Mi ta sinti falta di e stimashon den e forma ku nos ta atendé ku otro, komo ruman den Reino”, sigun Mercelina. “E ta bisa ku e tin simpatía pa Kòrsou, pero su akshonnan ta mustra otro.”
Pero kon ta yega na un solushon? No nesesariamente manera Hulanda kier, pero sigur tambe mester sigui e ideanan krioyo. “Kòrsou tin mester di aliadonan pa yud’e sali for di e krìsis. Sin e aliadonan korekto ta difisil. Pero tin hopi oportunidat pa krese den krìsis. Kòrsou mester stòp di isolá su mes i buska lasonan no oropeo.”
Danny Ruiter
Danny Ruiter ta un otro hóben polítiko ku ke partisipá n’e próksimo elekshon. Algun luna pasá el a bin biba bèk na Kòrsou despues di a studia na Hulanda i tabata aktivo p’e partido hulandes VVD. E ta konvense ku pueblo di Kòrsou tin ‘un orguyo falsu’ pa akseptá e yudansa hulandes.
Sigun Ruiter, restrukturashon general ta e kondishon pa Kòrsou sali for di e krísis. Ademas, e aspekto di edukashon mester haña hopi mas atenshon.
Danny Ruiter ta kombersá ku Dulce Koopman
“Nos mester lubidá riba e asuntu di independensia, pasobra ta demostrá ku ni outonomia nos no por karga.” Ruiter ta preferá pa ku Kòrsou bira un provinsia di Hulanda i integrá den Oropa. Esaki lo hasi posibel pa hasi uso di e kapasidat hulandes. No solamente kapasidat finansiero i ekonomiko, pero entre otro e kapasidat pa traha i realisá leinan (wetgevingscapaciteit).
