WIILEMSTAD – E partidonan di oposishon di mas grandi MFK i KNT ke sa kiko e akuerdo polítiko entre Kòrsou i Hulanda tokante e pakete di sosten ta enserá. Ámbos ademas ta sképtiko tokante e alkansabilidat di e akuerdo.
Gilmar Pisas, lider di frakshon di MFK, despues di firmamentu di e akuerdo polítiko huntu ku e dos otro lidernan di e frakshonnan di mas grandi a sinta na mesa ku sekretario di estado Raymond Knops. Esaki a kontestá pregunta di e parlamentarionan kurasoleño.
Pasobra e detayenan di e akuerdo ainda no ta konosí komo ku e lei di konsenso di reino ainda mester bai Raad van State pa konseho. Ta te ora esaki ta kla numa por hasi e kontenido di e lei públiko.
Pero Pisas ta bisa: “Tòg nos ke mas klaridat. Pero ora mi a puntra ki dia e lei ta bini antó, nos a haña un sorpresa.” Segun e, e ora ei e sekretario di estado hulandes a klarifiká ku pa motibu di e elekshonnan binidero na Hulanda otro minister di repente ke pasa hopi lei. I esaki ke men ku no ta sigur si Raad van State por atendé ku e lei di reino na tempu.
“Ke men tin un chèns grandi ku e lei di reino lo no pasa mas den tres luna. I despues ta un gobièrnu nobo na Hulanda lo trata di esaki. Pero segun e sekretario di estado ta posibel ainda tambe ku e ta sigui ainda ora gabinete ta demishonario. Despues di elekshon tòg ta dura poko tempu promé ku a forma un gobièrnu nobo.
Amparo Dos Santos di Kòrsou pa Nos Tur ta bisa ku e ta falta informashon tambe tokante kiko e akuerdo ta enserá. “Señor Knops ta trahando un sine. Pasobra pakiko no por a firma mésora na Hulanda? Esei a bai malu kaba.”
E tambe ta papia di elekshonnan pero di esnan di Kòrsou. Meskos ku na Hulanda nan tambe ta tuma lugá otro aña na e isla. “Nos no mester lubidá kiko a pasa ku Aruba. Ta bon pa Knops sa. Nan (Hulanda, red.) a invertí hopi den AVP. Pero MEP a gana. Esaki no ta bai yuda boso, boso ta bai pèrdè sèn so.”
E lider di oposishon ta splika kiko e ke men ku esaki: “Si bo trese plaka, Knops, tres’é pa pueblo i no pa un guèn di ladron. Esaki ta di tres bia kaba.”
Stephen Walroud, lider di frakshon di partido di gobièrnu PAR tambe a sinta na mesa ku e sekretario di estado hulandes despues di firmamentu pa splikashon na parlamento kurasoleño. E ta haña ku e isla ‘mester konfia e ámtenarnan ku a negoshá’. Tambe si e kontenido di e lei di reino no ta konosí ainda.
“Loke ta pará den e pakete di paisnan (pakete di sosten, red.) ta públiko i tambe den liña grandi kiko lo bini den e lei.” Riba e pregunta kiko e siudadano lo ripará mésora, Walroud ta bisa:
“Ku e pais lo no kai den otro. Ambulans ta bini, por paga polis i dosente. Mihó bisá: bida públiko por kontinuá. Pasobra sin sosten hulandes nos ta kai. Pasobra kaha di gobièrnu ta bashí, negativo kaba.”