KRALENDIJK – “Mi ta gradisidu ku ta rekonosé i apresiá e dunadónan di kuido”, enfermera di diálisis Shahaira Salas-Libier ta konta. “Na mes momento e kos ta sinti manera diskriminashon; komo munisipio ekstraordinario nos tambe mester sigui tur regla i desishon di Hulanda, ke men pakiko e bónùs di kuido no ta konta pa nos?
E sindikato di Empleado Boneriano, A.F.B.W., a pidi ministerio di Salubridat, Bienestar i Deporte pa revisá nan desishon pa no duna e bónùs di kuido na Hulanda Karibense. E bònt ta representá 430 miembro for di Fundashon Mariadal i a haña hopi mensahe tokante esaki di empleado. “Nan ta sinti manera a lubidá nan”, presidente Cherel Kwidama ta konta.
Personal di kuido na Hulanda Karibense ta bou di preshon sigur
Ounke e kantidat di atmishon na hòspital a keda limitá te na tres persona, esei segun Giovanni Frans, presidente di konseho di maneho di Fundashon Mariadal, no ke men ku no tabata trata di un preshon di trabou haltu.
“Nos ta haña nos ku skèdjel ku ta kambia i ku ta mas intensivo, karentena i isolashon di personal i famia, fayesementu, un kambio di petishon i oferta ètsétera. E personal for di mart ta bou di un preshon inkreibel, direktamente komo konsekuensha di Covid-19.”
Shahaira Salas-Libier
Salas-Libier ta konfirmá esaki; “Ora un pashènt ku corona a bini den kontakto ku nos personal, kasi henter e departamento a sera. Kolega ku no tabatin kontakto mester a traha 12 ora riba un dia pa motibu di falta di personal.”Pashènt tambe a sufri di esaki. “Por ehèmpel di repente mester a para operashon planeá.”
Empeño èkstra pa motibu di kapasidat limitá
Banda di esaki presidente Cheryl Kwidama, ku tambe ta traha na e hòspital 16 aña kaba, ta enfatisá ku e preshon aki pa motibu di kapasidat médiko limitá ta mas grandi ku na Hulanda. “Nos no por pidi ayudo di otro hòspital manera na Hulanda si por. Ei tin desena di ambulans ta kore, nos por ehèmpel tin dos so.”
Shahaira ta di akuerdo; pasobra nos ta asina chikí i sierto previshon no ta serka aki, nos mester empeñá èkstra pa e seguridat di esnan ku mester di kuido, pero tambe pa nos mes den relashon ku nos famia.
Lista di bónùs
Cherel Kwidama no por bisa ku siguransa kuantu personal di kuido aki lo bini na remarke pa e areglo, pero sí ku un gran parti di e organisashon ta haña nan ku pashènt di corona. “Promé bo tin e personal di ambulans, despues e ayudo di emergensia, despues e spesialistanan i kaba e kuido spesial. Ke men e ta pasa den henter e organisashon.”
Kubrí kompletamente pa e kontakto ku pashènt. Potrèt Shahaira Salas-Libier
Segun Shahaira un hende ku indirektamente a trata ku corona tambe tin derechi riba e bónùs. “Na trabou nos tur ta empeñá pa e pandemia aki. Tambe por ehèmpel esun ku ta pèrkurá pa e lakennan pa e departamentonan di kuido. E tambe ta kore riesgo, i su famia tambe.”
Shahaira ta konta ku e personal lo aseptá tambe si ta un suma adaptá, pero ku nan ke klaridat. “Ta trata di rekonosementu. Nos ta hasi nos trabou ku amor, pashon i empeño, ku tur riesgo ku ta pertenesé na esaki, ke men nos lo apresiá komprenshon p’esaki.
Pregunta den Kamer
Cherel Kwidama ta kontentu ku GroenLinks ku VVD aktualmente na Hulanda ta empeñá pa aun logra haña e bónùs di kuido pa e islanan BES. “Tur hende ku ke koperá ta mas ku bonbiní. E hendenan na Boneiru tambe meresé e rekompensa aki.”