ORANJESTAD – Gobièrnu arubano ta traha na un plan pa ‘siña biba ku e vírùs sin limitashon’. P’esei e hòspital mester bai invertí den un ampliashon struktural di e departamento di intensive care i corona. I lo investigá e maneho di tèst.

Asina e minister di Salubridat Dangui Oduber ta bisa den un rueda di prensa den kua gobièrnu ta indiká ku nan lo no tuma medida nobo ounke omikron ta pèrkurá pa e sifranan di mas haltu di kontagio for di dia di e pandemia.

“Nos ta den e di sinku ola. Kada bia ta bini diferente variante. E mensahe awor ta ku nos ta trahando un plan kon nos por biba kuné. Di pandemia pa endemia . Sino bo ta keda kai bèk den e mésun siklo di e último dos añanan ku ta tene Aruba, mundu, sekuestrá.”

Riba e pregunta di Ret Karibense kon Hòspital Horacio Oduber (HOH) ta bai hasi esei miéntras e ta den sifra kòrá pa añanan kaba, e minister ta bisa:

“Ta bèrdat ku mester bini un maneho finansiero mihó pa e hòspital, pa manehá e entradanan mihó. E prioridat di gobièrnu ta pa amplia e kapasidat. Ku tur e retonan finansiero e hòspital mester tene kuenta ku e prioridat aki.”

Segun e no ta asina karu tampoko ku e hòspital lo no por paga. Ademas e minister ta bisa ku e hòspital tin sèn. “Ku e kantidat di tèst, di turista, i awor ainda di míles di arubano, nan tin sufisiente entrada pa invertí den kapasidat.”

Den entrevista ku e último dos direktornan di e hòspital nan a bisa Ret Karibense ku e preshon riba e finansanan pa motibu di e pandemia a bira mas grandi ainda. Tin entrada èkstra sí pero esei e hòspital tabatin mester di dje pa sera otro buraku. Pero minister Oduber ta reakshoná riba esaki ku: “Kere mi: nan tin un bùfer.

E mandatario ta bisa sí ku e reto di mas grandi pa ekspanshon ta personal. “Mundialmente tin skarsedat i p’esei no ta fásil pa haña personal. Hòspital i AZV (seguradó nashonal red.) p’esei ta trahando pa haña personal mas lihé posibel pa e kapasidat deseá.”

Esei en todo kaso ta nifiká ku e kantidat di kama di icu mester subi di 12 pa 16 pa segun e minister “por biba mas liber sin medida”. Banda di esaki gobièrnu ke adaptá e maneho di tèst.

“E intenshon di tèstmentu semper tabata pa limitá plamamentu, e kantidat di kontagio. Pero aktualmente nos tin mas ku 3000 kaso kaba, ke men e vírùs a plama kaba”, e minister di salubridat ta splika. E pregunta ta si tin sentido ainda pa tèst, e ta bisa

E diskushon ta si bo mester tèst solamente grupo vulnerabel i hende den profeshon esensial. Pasobra, pa tèst tur hende manera nos ta hasi aworakí, ta kosta hopi sèn i no ta duna e resultado deseá manera den e di kuater ola. Pues e simannan binidero nos ta bai wak kiko e maneho nobo lo bai bira.”

E último sifranan (5 di yanüari) ta mustra ku un rèkert nobo (1162) di persona a tèst positivo. Tin mas ku 3700 kaso aktivo na e isla di rònt di 125 mil habitante (inkluso esnan indokumentá). Tin 21 pashènt di corona den hòspital di kua 3 den kuido intensivo. Pasobra e situashon na hòspital ta bou di kòntròl ainda, gobièrnu ta bisa, no tin mester di medida èkstra. Skolnan ta habri sí te otro siman na lugá di 6 di yanüari.