KRALENDIJK – Ounke ku tin desaroyo positivo rònt di produkshon di awa di bebe, ainda e preis ta muchu haltu. Esaki ta sali for di un rapòrt tokante e maneho di e ministerio di Infrastruktura i Maneho di Awa ku a manda Tweede Kamer poko dia ei.
Munisipio di Boneiru a indiká anteriormente kaba ku e tarifanan di awa di bebe mester bira meskos ku Hulanda Oropeo. “Mester di supsidio sí p’esaki i lo por a paga esaki ku sèn si gobièrnu. Na Texel tambe esaki ta sosodé”, un bosero ta bisa na nòmber di Kolegio Ehekutivo.
No ta promé bia ku ta trese e problema aki dilanti; na 2018 tambe a manda un karta di Kamer tokante di esaki. Pakiko ainda e preis di awa ta muchu haltu?
Proseso di produkshon karu
“Pa falta di fuente di awa dushi mester traha awa di bebe di awa di laman. Esaki ta un proseso karu”, e Kompania di Awa i Energia di Boneiru (WEB) ta laga sa den un reakshon. Banda di esaki Boneiru ta chikí i asina mester parti e gastunan den relativamente tiki hende. “Aki ta bini aserka ku e entradanan (mínimo) ta relativamente abou kompará ku Hulanda oropeo”, segun Kolegio Ehekutivo.
Den e karta di Kamer e tempu ei a trese e problema dilanti kaba; mester a komprobá si e awa di bebe ta pagabel i a yama e partidonan pa trata e problemátika konhuntamente.
Empeño pa awa di bebe pagabel
Kiko e tarifa ta eksaktamente no a determiná ainda, pero e partidonan envolví a laga sa ku pa hopi tempu kaba nan ta empeñá pa mehorá e situashon. Asina por ehèmpel a introdusí un legislashon nobo kaminda ta regulá WEB tantu riba kalidat komo riba gastu.
Ministerio di infrastruktura i Waterstaat na su turno ta duna supsidio pa tene e awa aksesibel Pa motibu di corona a subi e supsidio aki. Aktualmente nan ta investigá e kon pagabel e tarifanan di awa di bebe ta. “Di mes munisipio Boneiru i WEB tambe ta envolví den esaki”, e ministerio ta laga sa den un reakshon. E resultadonan di esaki ta ferwagt medio 2021.
Determiná un tarifa pagabel
Banda di esaki konhuntamente mester determiná kiko ta un tarifa pagabel. “Mester bini direktiva kla entre ministerio di I & W i munisipio Boneiru. Den esaki e papel di ministerio di Asuntunan Sosial i Empleo (SZW) tambe ta importante ku determinashon di e suma mínimo di eksistensia”, segun e bosero di Konseho Ehekutivo.
“Naturalmente nos no ta determiná e preis nan ei di previshonnan, pero e suèldu mínimo i e ònderstant mester ta den relashon sí ku kosto di bida”, e bosero di SZW ta konta. “Tokante e relashon ei kontinuamente tin deliberashon ku e diferente ministerionan. Por ehèmpel no tin masha sentido pa subi e ònderstant, miéntras e previshonnan tambe ta bira mas karu.”
Desaroyo positivo
Ounke e preis di awa ta un punto difísil, e rapòrt ta mustra desaroyo positivo tambe. Asina WEB ta tuma e produkshon di awa di bebe den su mes maneho. “Pasobra esei riba término largu lo tin un efekto positivo pa e isla”, Ko Hendriks di WEB ta bisa. E fábrikanan di awa pa esaki mester ta kla e aña aki.
Tambe ta tene kombersashon ku diferente stakeholder tokante ponementu disponibel di awa di irigashon. “Aktualmente ta drechando e pipa di irigashon. Despues por ofresé e awa purifiká na resòrt ku por us’é pa nan kuránan”, Hendriks ta konta. Kunukeronan mes por buska e awa di irigashon aki na LVV.