KRALENDIJK – Hende indokumentá na Boneiru tambe ta bini na remarke pa e vakuna di corona. A lo ménos, esei diputado Nina den Heyer ta primintí.
E promé karga di vakuna ku a yega kuminsamentu di e siman aki, ta sufisiente pa 2000 hende i personal di kuido ta na turno promé. For di djaluna 22 di febrüari ta vakuná e personal di kuido di Fundashon Mariadal.
“E preparashonnan a kuminsá kaba i tur kos ta segun skèdjel”, Den Heyer ta sigurá. For di promé di mart e vakunashon di e grupo di edat sesenta plùs ta kuminsá, entre nan tambe esnan indokumentá di e edat aki. “No ta hasi distinshon, ta yama tur hende. Informashon na spañó tambe lo ta disponibel”, segun Den Heyer, ku tin e kartera di Asuntunan Sosial.
Ehekushon
Dòkternan di kas Bernabela i Castro ta duna kuido médiko na esnan indokumentá na petishon di Caritas, un organisashon ku ta yuda migrante sin papel di estadia. Nan ta hasi esaki boluntariamente pasobra e grupo aki no por haña seguro médiko i tin difikultat pa haña kuido médiko. “Mi ta yuda for di solidaridat”, asina dòkter Bernabela ta bisa. E tin kontakto ku diferente persona sin papel di estadia i ta konosí komo persona di konfiansa den e grupo aki.
E personal di kuido ta vakuná na e hospital Fundashon Mariadal. Sobra di e poblashon ta vakuná na un fasilidat di deporte na Playa òf na Fundashon Cocari na Rincon.
“E registrashon di esnan indokumentá pa un vakuna ta sosodé den práktika di dòkter Bernabela”, pastor Ivan Perez-Gomez di Caritas ta bisa. No ta kla si e práktika aki tambe ta e sitio di vakunashon pa esnan indokumentá.
‘Mester firma un protokòl sí segun e direktivanan di derecho humano internashonal’
Segun Perez-Gomez e plan di ehekushon pa e vakunashon di esnan indokumentá ta kla. Ta un koperashon entre Caritas i e gobièrnu lokal i e departamento di Salubridat Públiko ta kordin’é. “Mester firma un protokòl sí segun direktivanan di derecho humano internashonal”, e ta bisa.
Vakuna sin prekupashon
E deskonfiansa di instansha di gobièrnu bou di e grupo indokumentá ta grandi. Pa miedu di deportashon hopi hende indokumentá lo no mèldu pa vakunashon. Ku e registrashon serka dokter Bernabela esaki por trankilisá e grupo vulnerabel aki.
Pa Den Heyer ta importante pa espesialmente hende den grupo di riesgo haña e oportunidat pa vakuná. “Bou di esnan indokumentá na Boneiru tin hende grandi di edat i hende médikamente vulnerabel. Nos ke pa hustamente un i tur ku ke vakuná por hasi esaki sin prekupashon.”
Den Heyer ta sigurá ku lo no persiguí e personanan sin papel di estadia ku registrá pa un vakuna. “Lo no usa e datonan ku ta bai den e sistema di registrashon pa otro meta.
Esnan indokumentá ta èkstra vulnerabel pa motibu di e krísis di corona
Un parti grandi ta sin trabou i ta kore e riesgo di eksplotashon. Esaki pastor Ivan Perez-Gomez di Caritas, un organisashon ku ta yuda migrante sin papel di estadia, ta bisa. Lesa mas aki.