WILLEMSTAD – Pa motibu di un instrukshon di Konseho di Minister na Den Haag parlamento di Kòrsou por kuminsá funshoná atrobe despues ku e aña aki e tabata basta paralisá. “Antidemokrátiko’ sekretario di estado (Relashonnan den Reino) Raymond Knops ta yama e situashon na e isla i e motibu pakiko Hulanda pues a intervení.
Por lo demas esaki tabata na petishon di gobièrnu di Kòrsou mes. Esaki a disidí den konseho di minister di djárason último pa hasi un petishon asina na Hulanda pasobra nan no tabata bini kla mas. “Nos mester tin bèrgwensa ku nos a laga e asuntu yega asina leu”, promé minister di Kòrsou Eugene Rhuggenaath a bisa e dia ei. I esei e minister plenipotensiario Anthony Begina ta ripití despues ku Konseho di minister di Reino a kaba awe na Den Haag.
“Nos tin bergwensa, di bèrdè mes mi ta para aki ku bèrgwensa. Mi a kere ku nos ta un pais ku ta funshoná normal i demokrátikamente i ku e tiponan di intervenshon asina no ta nesesario.”
‘Laga un otro hasi e trabou difísil’
Pero un di e partidonan di oposishon ku ta bòikotiá e reunionnan públiko di parlamento di Kòrsou, ta bisa ku ta eksaktamente e aktuashon di e gobièrnu aki ta bai kontra demokrasia kurasoleño. “Esaki no tin nada di hasi ku demokrasia, pero ku algun partido polítiko (koalishon, red.) ku ta kere ku awor nan por hasi tur kos ku nan ke anto kaba laga otronan hasi e trabou difísil”, Menki Rojer, di partido di oposishon KDNT ku dos asiento, ta bisa.
Huntu ku MFK (5 asiento), MP (1 asiento) i dos parlamentario independiente KDNT a sòru pa reunionnan importante no por a sigui. Den e reunionnan ei mester a trata lei ku entre otro ta nesesario pa kumpli ku e obligashonnan ku Hulanda a pone pa e fiansanan di corona ku Kòrsou tin hopi nesesidat di dje den e krísis aki. Pero ta nèt e palabrashonnan aki ku ta keda forma problema masha grandi pa oposishon.
“Ku COHO (Órgano karibense pa Reformashon i Desaroyo) algun hulandes aki i nan Den Haag lo bai dikta. Ke men aworó ku tur kos a pasa kaba (lei ets., red.) ni nos gobièrnu ni nos parlamento no tin nada mas di bisa na Kòrsou. Nada nada mas”, Rojer ta sigui ripití.
No tin lei, no tin sosten
E sekretario di estado hulandes ku huntu ki minister plenipotensiario di Kòrsou awe meinta na Binnenhof na Den Haag a duna un deklarashon pa e intervenshon, ta haña ku ‘un parti di parlamento, sabiendo masha bon, ta inkapasitá demokrasia na e isla’. Un situashon ku segun e – tambe pa motibu di elekshonnan na mart awor – por a keda dura te na mei i asta despues.
Ademas e ta masha kla tokante e sosten di corona: “Na momento ku no por trata e leinan ei, no por bini sosten di likides tampoko.”
Mayoria den parlamento
Ku e instrukshon parlamento por sigui awor i pa kuminsá por bai hasi su mes kompleto atrobe: tene un reunion kaminda ta huramentá e parlamentario Emmilou Capriles di partido di gobièrnu PAR i ku esaki yena tur e 21 asientonan. Despues e partidonan di koalishon atrobe lo tin e mayoria den parlamento (11 asiento) i e kantidat mínimo pa laga tur reunion sigui. Pasobra segun presidente di Staten Ana-Maria Pauletta tin purá: banda di tratamentu di lei mester reuní tambe tokante otro asuntu importante manera e programa di vakunashon kontra corona
