ORANJESTAD – “Ami lo no drenta Parkietenbos pa bai mira, tin sushi radioaktivo i asbèst”, sekretario di estado Alexandra van Huffelen (relashonnan den Reino) ta tende di siudadano prekupá ku ta lucha kontra e seru di sushi. Nan ta masha kontentu ku porfin un mandatario hulandes ta skucha nan.
Anouk Balentina den kòmbersashon ku sekretario di estado Van Huffelen.
A agregá e bishita na delaster momentu na su programa yen yen. Asina tambe e konosido aktivista di dùmp arubano Anouk Balentina aun ta haña e oportunidat pa interesá un mandatario hulandes pa e ‘violashon di añanan largu di derecho humano den Reino ku niun hende no ta hasi nada na dje’.
“Mi a tende algun ora delantá numa, mi mester a kore regla hende pa wak mi yunan. Ma mi ta asina kontentu! Esaki ta duna mi asina tantu energia pa sigui”, Balentina ta bisa. Anteriormente ainda e tabata ‘masha desapuntá’ ora a resultá ku e lo no ta un di e siudadanonan ku ken Van Huffelen riba su gira di sera konosí na e islanan lo a papia.
Un dia promé ku su yegada ainda Balentina a manda un karta habrí pa media:
Djis promé ku e bishita di Van Huffelen di repente tin konteiner ta blòkia e bista riba Parkietenbos
Un dia promé ku e bishita di Van Huffelen e minister arubano di medio ambiente Ursell Arends ta hasi un ròndu di inspekshon den Parkietenbos.
“Mi ta gradisí bo masha pasobra bo yegada ta trese aktividat di banda di nos mandatarionan. Pasobra di repente yen di hende i instansha ta drenta den akshon pa pèrkurá pa e banda pafó di Parkietenbos keda nèchi nèchi. I p’esei awe ku bo lo kore pasa aki dilanti mi ta masha, masha kontentu, pasobra e ora ei e habitantenan di bario tambe tin un dia di sosiegu. No tin holó stinki, no tin materia venenoso pa inhalá. Porfin un dia ku airu limpi.”
Si ta e karta a kousa ku e sekretario di estado di a kambia di idea i a bai papia kuné no ta konosí. Sí Van Huffelen ta e promé mandatario hulandes for di hopi tempu ku no ta klasifiká Parkietenbos komo un ‘asuntu di e pais mes’. Òf ku ta un asuntu di gobièrnu arubano ku Reino/Hulanda no por mete kuné.
Por tende un otro zonido di dje ku di sekretarionan di estado i ministernan anterior. Eseinan tabata fókùs mas tantu riba un presupuesto bon manehá pa saka Aruba for di e sifranan kòrá. Finansa ta keda importante Van Huffelen ta rekonosé, pero e ta mustra klaramente ku tin mas kos ku e ke empeñá p’e. Espesialmente den e área di derecho humano i desigualdat sosial.
sekretario di estado Alexandra van Huffelen na Aruba
“Lo mi empeñá pa esaki sigur i ta pasobra mi ta haña esaki masha importante, no? Enseñansa ta importante, kuida pa trata e problema di pobresa. Pasobra sin esaki bo no por laga bo pais krese i bona.” I kontra e habitantenan di Parkietenbos e ta bisa: “Mi ta bai traha riba esaki ku gobièrnu (di Aruba, red.). Mi ta kere ku ta masha importante pa trata e problema aki tambe.”
Elvis López di Ateliers ’89 ta guia Van Huffelen de e sentro di arte. E ta basta dekaí. E sekretario di estado ta bisa ku e ke empeñá tambe pa kultura na e islanan.
Van Huffelen ta bisa ku e lo papia ku e gobièrnunan lokal tokante e problemanan, pero ku finalmente e ke trata esakinan espesialmente ‘den koperashon”. I manera a palabrá den e akuerdo di koalishon, e ta bisa, lo bini fondonan mas grandi disponibel pa e islanan karibense. Kiko siudadano por ferwagt riba término kòrtiku di e sekretario di estado?
“Ta tempran ainda no? Mi ta serando konosí. Pero pa un próksimo bia mi ta kere ku mi lo ke hinka mas aden. Masha konkreto: for di Hulanda tin medio ta bini pa durabilisá e previshonn di energia i e trato di e problemátika di pobresa.”
