Ken ta resultá di ta e match ku por salba su bida? Un dama arubano (62) ku ta risibí trato pa leukemia den Hospital Erasmus na Rotterdam ta warda un transplantashon di stamcel. E famia ta spera ku nan por haña un donor den área karibense.
Ret Karibense a papia ku e famia, ku ta preferá di no publiká e nòmber di e pashènt. Pasobra e ta di desendensia karibense i tin tiki donor, aktualmente ta mas difísil pa haña un match. Pesei e famia ta spera hopi hende lo mèldu pa hasi un simpel tèst di skupi. Si tin un match por salba e bida di nan mama.
Famia ta tene speransa
E persona aktualmente ta haña ‘immuuntherapie’ pa prepará pa un transplantashon. Tambe a tèst i kaba pa e proseso ei. “Aktualmente no tin un match. Pero via diferente banko di donor ta sigui buska pa na final por haña un donor”, asina e famia di e persona a laga sa. “I nos ta spera tambe ku hopi hende lo laga registrá nan mes. Nos ta tene speransa.”
Na okashon di e situashon di e señora e organisashon Caribbean Stem Cell Donors a start un kampaña di promoshon. E kampaña a kuminsá pa hopi purá buska un ‘match’ pa su mama. “Pero ora nos a bai buska den e parti karibense di Reino, nos a deskubrí ku no tin niun sorto di infrastruktura pa esaki”, e ta splika.
Pakiko mester di nèt donor di stamcel di orígen karibense?
Pa aña algun mil hende na Hulanda ta tende ku nan tin un forma di kanser di sanger. Un pashènt ku leukemia òf un otro forma di kanser di sanger por kura pa medio di un transplantashon di stamcel. Na Hulanda tin un skarsedat grandi di donor di stamcel.
P’esei no ta logra pa haña e donor di stamcel di mas adekuá pa kada pashènt. Mas donor ta nifiká pa pashènt un chèns mas grandi pa biba. Pa haña un donor adekuá desendensia ta hunga un papel importante.
Hende di mésun desendensia tin un chèns mas grandi riba un match. Aktualmente e kantidat di donor di stamcel registrá di desendensia karibense no ta basta grandi pa yuda e kantidat di pashènt hopi malu den e komunidatnan aki na Hulanda.
E komunidat karibense na Hulanda ta diverso i e falta ta konta pa tur etnisidat den e komunidat aki. Banda di etnisidat e region for di unda bo ta bini tambe ta masha importante pa haña un match. Ta pesei e fundashon Stichting Matchis spesífikamente ta buska habitante hulandes ku ta bini di Kòrsou, Aruba, Sint Maarten, Boneiru, Sint Eustatius i Saba. (Informashon di www.matchis.nl – Nederlands Centrum voor Stamceldonoren, trad. Sentro hulandes pa donor di stamcel)
Konsientisashon
Segun un yu muhé di e dama ta trata di mas ku solamente haña un donor di stamcel pa su mama. “Nos ke traha na un konsientisashon den Karibe pa asina pèrkurá pa un infrastruktura.”
“Si e infrastruktura ei tei e habitantenan di e islanan karibense di Reino por registrá i na un manera fásil bira donor. Pa asina nos por yuda e hendenan na e islanan mes ku tin mester di transplantashon di stamcel.”
Habitante di Aruba, Kòrsou i Boneiru ku e mèldu por manda un whatsapp pa +297-7381979. Hende di Karibe ku ta biba na Hulanda i ku ke mèldu por registrá online via www.matchis.nl