Fondo di Sine Hulandes poko tempu pasa a lansa “Studio Caribe”, un programa nobo eksitante dirigí riba enkurashamentu di idea pa sine di talento na e islanan Aruba, Boneiru, Kòrsou, Saba, Sint-Eustatius i Sint-Maarten.
E inisiativa nobo aki ta marka un paso importante pa e industria di sine karibense, ku un fókùs spesífiko riba deskubrimentu i sosten di talento di e islanan menshoná. Sea bo ta un senarista baké, un direktor aspirante òf un produktor ku a kaba di kuminsá, Studio Caribe ta ofresé un oportunidat úniko pa duna bida na un sine kòrtiku (pa hóben).
Eloise van Wickeren, Film Commissioner Kòrsou, ta splika ku e inisiativa aki ta sali di un kolaborashon kontinuo ku Filmfonds pa enkurashá mas proyekto di Kòrsou i Hulanda Karibense pa finansiamentu. E ta enfatisá e importansia di e areglo nobo aki pa krusa e abismo entre produktor establesé i sineasta hóben ku ainda no tin eksperensia pa produsí pelíkula.
“Nos ta trahando algun aña kaba ku Filmfonds pa laga poko mas proyekto di Kòrsou i Hulanda Karibense mèldu serka Filmfonds. Den pasado esaki tabata difísil pasobra e eksigensianan di entrada ta basta haltu”, segun Van Wickeren.
Sine kòrtiku
Ta enkurashá trahadó di sine karibense pa kuminsá produsí sine kòrtiku komo promé paso den direkshon di proyekto mas grandi. Studio Caribe ta ofresé un areglo spesial pa esaki ku ta aksesibel solamente pa e islanan hulandes karibense.
Van Wickeren ta splika ku e proseso ta kuminsá ku e entrega di un idea pa un sine, for di kua lo skohe diesdos proyekto pa desaroyo mas aleu, ku un supsidio di 10.000 euro pa proyekto.
“E proseso ei ta enserá ku nan ta haña un trayekto di guia kaminda nan lo tin kombersashon ku diferente produktor pa desaroyá nan idea”, e ta agregá. Despues di e trayekto di desaroyo ta selektá seis proyekto pa produkshon, ku un kontribushon di 60 mil euro pa proyekto.
Proyekto lokal
Van Wickeren ta enfatisá ku Studio Caribe ke sostené i stimulá talento lokal. “Ta e intenshon pa e bira un proyekto lokal ku hende lokal. E intenshon ta pa desaroyá e talento lokal aki”, e ta bisa.
E areglo aki ta ofresé un oportunidat pa talento hóben ku ke purba traha sine kòrtiku òf largu. “Tin masha hopi trahadó di sine hóben ku ta okupá nan mes ku commercial i video di muzik. Si e hendenan aki ke hasi un transishon pa un sine kòrtiku narativo òf un pelíkula nan por mèldu. Hopi di nan tin ambishon sí pero ainda no tin eksperensia”, Van Wickeren ta splika.
Studio Karibe ta duna nan e sosten finansiero pa hasi e transishon aki posibel. Trahadó di sine ku ta interesá, mester ta biba na e islanan i mester tin algu di eksperensia den e sektor. E areglo no ta ofresé solamente un reda finansiero, sino tambe un plataforma pa talento lokal pa desaroyá nan mes i sigui krese den e industria di sine.
E temporada pa hasi e petishon pa Studio Caribe ta habrí for di 15 di aprel i ta kore te 21 di mei 2024. Ta enkurashá trahadó di sine ku ta interesá pa entregá nan petishon na tempu i nan por haña mas informashon riba e website di
Filmfonds. https://www.filmfonds.nl/actueel/feestelijke-lancering-studio-caribe-op-
curaçao-en-aruba