Manon Meijer a biba i traha henter su bida na Hulanda. Te ora su mama, Silvia Marsera, nasé na Rincon, a bira demente. E ta tuma e desishon drástiko di para su bida manera e konos’é, i muda pa Boneiru ku su mama. “Hende ku demensia ke regresá pa nan isla,” e ta aklará su eskoho. Na e tera natal di su mama, e sinku añanan di mas pisá di su bida ta warda Meijer. A la bes e ta duna su mama e añanan di bida di mas bunita posibel.
“Banda di e tristesa después ku mi tata a fayesé, e promé señalnan di demensia a kuminsá aparesé serka mi mama,” Meijer ta kuminsá konta. Na promé instante su mama a bai biba den un apartamento ku vigilancia, ya yudansa por ta serka. Pero e mama ta bai atrás i ta papia mas i mas di su hubentut. Meijer ta skohe huntu ku, i pa, su mama pa muda pa Boneiru. “Pa bon ku e asistensia na Hulanda por ta, finalmente e kos di mas bunita ta pa bira grandi den un ambiente konosí.”
E biahe pa Boneiru ta pisá; den e avion su mama ta bai for di su mes komo konsekuensia di tantu strès. “Est’ un komienso,” Meijer ta pensa. Pero afortunadamente, una bes ku nan a drenta e kas di e famia na Kralendijk, a sali na kla lihé ta pakiko nan a hasi e esfuerso. “E tabata sinti su mes asina bon ei, realmente tabata su hogar.” E tempu ei su mama tabata kana bon i tabata kòmbersá hopi. “Mi tabata papia hopi kuné, dun’é korant pa lesa. Unda ku m’a bai, mi tabata hib’é kumi; pero mi tabata por sali un ratu mi so tambe.”
Manon Meijer. Foto Deborah Bremmer
E kuido ta bira kada bes mas pisá
Ora Meijer a bishitá Hulanda, pa di promé biaha den dos aña, un ratu i ta laga e kuido di su mama den man di otro, ta bira dramatikamente bisto kon importante e atenshon personal ei ta. “Di ripiente el a kai totalmente den otro.” Su mama no por ni kana, ni papia mas. “E sintimentu di fakansi ta disparsé lihé, e ora ei.” Afortunadamente kosnan ta bira poko mihó, pokopoko, pero su mama no ta bira esun ku e tabata mas. E kuido ta bira kada bes mas pisá.
“Yudansa tin, pero e ta difísil pa haña. Bo mester sa di tur e kanalnan. No t’asina ku tin un sitio kaminda es’nan ku ta duna kuido informal por haña tur informashon na un forma kla tokante tur loke ta disponibel na asistensia i na unda por haña esaki. Kon por ta posibel ku ta después ku mi mama a fayesé numa m’a bin haña sa ku ta eksistí un Fundashon pa Kuido Informal?”, Meijer ta puntra su mes.
“E último mitar aña sí mi n’ ta’ por mas: e kuido a bira asina pisá,” Meijer ta kòrda. P’esei e ta konsehá tur hende ku ke bai duna kuido informal, pa traha un lista adelantá ku tur hende ku por yuda ora e trabou bira pisá. “Si ta di ripiente asina bo ta bai duna kuido informal, bo no tin un idea di ta ku kiko bo ta kuminsá – i esei ta bon tambe. Pero una bes bo ta aden, ta lat pa bai buska yudansa, ta sobreviví bo ta purba sobreviví.” Estando leu fo’i kas, Meijer no tin amiga òf famia rondó di dje pa yud’e. “E ruman muhé di mi mama ta e úniko ku a bisa: Manon, bo por bèl mi semper”, e ta konta agradesidamente. “Esei ta hasi tur e diferensia.”
Silvia Marsera. Foto Manon Meijer
Sobrevivensia
Aña pasá ku Pentekòster, a bini un fin na e sobrevivensia, ora Meijer su mama a fayesé. Ta despues di esei numa Meijer por mira patras riba e periodo di kuido. “Dunamentu di kuido informal a kambia mi komo hende,” e ta kompartí yen di konvikshon. “Awor mi ta buska positivismo di forma mas konsiente. Mi ta hasi kos ku ta hasi mi kontentu i mi ta trein mi mes pa ta agradesidu.” E ta sinti su mes masha fuerte, mentalmente. “Dunamentu di kuido informal ta e trabou di mas pisá na mundu. Si bo a sobreviví esei, bo por ku tur kos.”
Awendia Meijer ta usa e forsa i eksperensia akí pa pidi atenshon pa hendenan ku ta duna kuido informal i pa sostené nan. E ta trahando na un buki ku relatonan di dunadó di kuido informal, i el a lansa ‘De Huiskamer’ (E Kamber di Sala): un sitio online pa dunadónan di kuido informal. Según Meijer ta di sumo importansia ku ta bini rekonosementu pa e trabou ku dunadónan di kuido ta hasi. “Nos ta hasi un trabou hopi importante. Si nos no tei, ta kiko ta pasa e ora ei? E ora ei e hendenan ku mester di kuido lo sukumbí òf nan lo ta hopi ménos felis si nan mester bai un kas di kuido. Mi ta pensa ku e ora ei e sosiedat lo ta poko mas duru, difísil i pisá. Ademas nos ta yuda gobièrnu spar hopi sèn.”
Entretantu Meijer a muda pa nan kas di famia den e kunuku na Rincon. “Mi no tabata sa adelantá ta ku kiko m’a kuminsá, pero afortunadamente mi ta bai bon ku Boneiru. Mi gusta e trankilidat.” Awor e ta traha den enseñansa, pero su soño ta pa riba e terreno kaminda e ta biba, e kuminsá ku un ecoresort pa dunadó di kuido informal, ku ta traha masha duru. “Asina nan tambe por sali for di e rutina un ratu i, pa un kambio, bira esunnan ku ta haña kuido.”
