KRALENDIJK — Tin un buèlta nobo den e krisis polítiko na Boneiru. Gezaghebber John Soliano ta spièrta pa e konsekuensianan di e instabilidat gubernamental, miéntras ku e partido Union Patriótiko Boneriano (UPB) ta indiká ku e lo no hasi mas intento pa forma un koalishon. Analista polítiko Norwin Willem ta papia di un situashon nunka bisto.
Den un karta pa Konseho Insular, Soliano ta skirbi ku e tantísimo kambionan polítiko for di ougùstùs aña pasá, a pone e stabilidat i kontinuidat di e gobernashon bou di preshon. E situashon a bira mas insigur despues ku dia 30 di yüli último UPB a retirá su konfiansa for di kooperashon ku Movementu di Pueblo Boneriano (MPB). Segun e gezaghebber, failnan sosial importante, palabrashonnan ku Reino i e proseso di presupuesto pa 2027 ta kore e riesgo di retraso. Ademas, e ta alertá pa señalnan di posibel metementu polítiko den e aparato públiko.
Soliano a hasi un yamada na e lidernan di frakshon pa yega na un solushon ku ta garantisá stabilidat di gobernashon te ku elekshonnan na mart 2027.
UPB: niun koalishon nobo
UPB ta bisa di ta kompartí e preokupashonnan tokante trankilidat gubernamental, pero ta mustra ku pa e partido e krisis aktual ta bai bèk te 26 di yüli 2025. Ku esei e partido ta rechasá e sugerensia di ku ta su desishon resiente lo a kousa e situashon aktual.
Ademas, UPB ta aklará ku e lo no trata na forma un koalishon atrobe. Sí e partido ta deklará di ta dispuesto pa tene konsulta konstruktivo i pragmátiko riba e futuro gubernamental di Boneiru.
‘Novum’
Segun analista polítiko Norwin Willem (un presentadó di radio eksperiensiá ku pa añanan largu tabata aktivo komo polítiko na Boneiru), e situashon ta un novum. “Nunka promé mi a yega di mira un inmadures polítiko asina,” Willem ta remarká. Segun e, e deskonfiansa entre e partidonan polítiko ta asina grandi entre tantu, ku un solushon polítiko normal ta parse difísil pa logra. E ta haña ku mester bin mas klaridat pa e poblashon, i ta mira un ròl pa e gezaghebber den esei. E ta pensa ku posiblemente un mediadó independiente lo ta nesesario pa sali for di e impase. “E problema a bira personal, i ta parse ku nan no por sali afó mas,” Willem ta bisa.
Ku UPB ningando di forma un koalishon un biaha mas, e responsabilidat pa haña un salida ta kai eksplísitamente riba Konseho Insular i e otro frakshonnan polítiko. Awor, e pregunta ta, ku si nan lo por restorá sufisiente konfiansa promé ku e elekshonnan di aki un shete luna, pa a lo ménos mantené Boneiru gobernabel.
