“Traha 36 ora no ta un luho.” Ku e mensahe ei, desenas di empleado a reuní na Boneiru djasabra 15 di ougùstùs na sede di e sindikato AFBW (Algemene Federatie van Bonairiaanse Werknemers, AFBW) pa apoyá e lucha pa un siman di trabou di 36 ora den sektor di kuido.
E trahadónan den kuido a hasi un yamada pa miho kondishonnan di trabou i un mihó balansa entre trabou, bida privá i famia. Na mes momento a pidi atenshon pa e preshon di trabou haltu bou di kua e trahadónan den kuido ta laborá diariamente.
‘Nos ta kanando atras’
Cherel Kwidama di AFBW a enfatisá ku Boneiru ta kedando atras riba e desaroyonan na Hulanda. “Nos ta lucha pa 36 ora. FNV na Hulanda ta lucha pa 32 ora. Nos ta kanando atras. Tur lucha ta bini ku sakrifisio,” segun Kwidama. (E Federatie Nederlandse Vakbeweging ta e sindikato di mas grandi na Hulanda. – red.)
Kwidama a dirigí su mes na e gobièrnu lokal tambe, i a hasi un yamada pa nan ekspresá nan mes mas enfátikamente den direkshon di Hulanda. “Gobièrnu lokal, no sea e ‘bomba’ ku ta suta e pueblo. Eksiguí di Hulanda ku no ta trata e pueblo di e manera akí,” Kwidama a bisa. (Den tempu di sklabitut e bomba (o kabesante/supervisor) tabata un persona sklabisá ku a doño di plantashi tabata nombra komo e supervisor prinsipal di e otro personanan sklabisá – red.)
Naidi Cicilia, kende a biba 20 aña na Hulanda i a regresá Boneiru despues, tambe a enfatisá ku segun e, e diskushon ta bai mas leu ku djis e kantidat di oranan di trabou. “Esaki no ta bai solamente tokante e oranan ku un persona ta traha, pero tambe tokante e ser humano tras di e oranan ei,” Cicilia a bisa. Segun e aktivistanan, mester mira e konsekuensianan pa e salú, e bida di famia i e kalidat di bida di e trahadónan den kuido tambe, ora ta diskutí tokante e orario di trabou.
Resolushon ofresé na gezaghebber
Durante e manifestashon a ofresé un resolushon tokante e siman di trabou di 36 ora na gezaghebber John Soliano. Siguientemente lo pasa e resolushon, ku Boneiru, Saba i Sint Eustatius a formulá, pa e ministerio hulandes di Salubridat Públiko, Bienestar i Deporte (VWS).
Ku esei, e manifestashon no tabata dirigí únikamente riba e gobièrnu lokal, sino tambe riba Hulanda. AFBW ke pa inkluí kondishonnan di trabou na e islanan BES di forma mas eksplísito den e diskushon tokante e futuro di kuido. Pa e demonstrantenan, finalmente e diskushon ta bai pa mas ku un siman di trabou mas kòrtiku. Segun nan ta trata di salú, dignidat i un miho balansa entre trabou i bida privá.
Gezaghebber John Soliano. Potrètnan: Hubert Evertsz
