“Den e anochi di 7 pa 8 di yüni 2025, banda di 3’or di mardugá, ta surgi un tiroteo espontáneo i di lokura dilanti di porta di Club Rush. Nunka antes un esena inoudito asina, estilo Wild West, ku asina tantu tiru, ku tantu públiko den un anochi di divertishon, i ku konsekuensianan asina desastroso, a tuma lugá den historia di Boneiru.”
Ku e palabranan ei, fiskal di Ministerio Públiko Daan Smits a hiba korte bèk na e momento den kua e sentro di Kralendijk a kambia den algun sekònde bira un lugá kaminda niun hende tabata parse di ta safe mas.
Tiru riba tiru
Ta mardugá grandi. Un bringamentu ku a kuminsá dilanti di porta di Club Rush, ta hala hopi mirones. Di ripiente dos tiru ta zona den direkshon nòrt. Un frakshon di tempu despues, tin bashamentu di bala. No un, ni dos, sino desenas. Den mas o ménos un minüt i mei, 56 tiru ta kai. Hende na kareda. Otronan buskando kaminda di skonde. E kaya ta kambia bira un kaos di violensia ku arma di kandela.
Anto Clayshanou Domacassé di diessinku aña di edta ta kai na suela. E mucha hòmber ku a bai sali un anochi, no ta bini kas mas. Segun Smits ta kasi inimaginabel ku no a mata mas hende e anochi ei. “Ta un milager, ku no a kai mas morto,” ta e esensia di su disertashon.
Djei tristesa ta bira vengansa
Pero segun Ministerip Públiko, e historia no ta kaba ku e morto di Domacassé. Djis despues ku a tira e hóben, su ruman hòmber lo a tuma un desishon konsiente, segun Ministerio Públiko: vengansa. Segun e fiskal, e plan ta nase pa bai tras di mucha hòmbernan di e grupo di e bario Nort di Saliña, i mata nan. Siguientemente e grupo perseguidó ta drenta den un Toyota Vitz i ta kore bai den direkshon di Nort di Saliña. Ei violensia di arma di kandela ta zona atrobe.
Ta tira for di e outo. Bala ta alkansá un mucha hòmber den su lomba. Ku esei, loke a kuminsá na Rush komo un eksploshon di violensia, ta haña un rabu, segun Ministerio Públiko: un búskeda dirigí riba vengansa.
Rekonstrukshon
Despues polis ta purba rekonstruí e ruta di e sospechosonan. Ta investigá telefòn. Ta saminá konekshonnan di wifi i torennan di transmishon. Ta pone imágennan di kámara banda di datonan digital. Segun Ministerio Públiko, e datonan ei ta indiká ku probablemente diferente di e sospechosonan tabata na Nort di Saliña rondó di e orario relevante. Pero un telefòn no ta bisa ta ken a hala e gai. Finalmente ta korte mester dedusí esei for di e totalidat di pruebanan.
I ta hustamente einan e fail ta bira kompliká. Ta un parti di e 56 hùlsnan, di e tirunan ku a lòs den mas o ménos un minüt i mei, so e investigashon forénsiko por a sigurá pa un análisis komparativo. Ademas, no a haña tur e armanan di kandela ku presuntamente a usa e anochi ei. E falta ei ta importante. Pasobra, pa konektá un hùls na un arma, di forma konvinsente, mester di e arma mes pa investigashon komparativo.
Pues, korte ta disponé di un fail enorme tokante e kantidat di violensia ku a usa, pero no di un hueya forénsiko kompleto di kada tiru.
E violensia ta bai mas atrás den tempu
Komo si fuera e fail no tabata sufisientemente ekstenso kaba, un tiroteo anterior den e bario di Amboina riba 11 di yanüari 2025 tambe a bira parti di e kaso akí. Ei tambe a sigurá hùls. NFI, (Instituto Forénsiko Hulandes, Nederlands Forensisch Instituut) a investigá e munishon i a kompará hùls for di diferente lokalidat.
Segun Ministerio Públiko tin similaridat entre e hùlsnan di Amboina, Rush i Nort di Saliña. Ta tresiendo un senario, den kua lo a usa e mesun Glock den diferente insidente di tiroteo, komo probabel dilanti. Asina hustisia ta purba di konopá diferente momento na otro. Pero no ta eksistensia di konekshon so korte mester determiná finalmente. E pregunta primordial ta, kua sospechoso a hunga kua papel.
Ministerio Públiko ta pone e responsabilidat di mas pisá pa e morto di Domacassé serka G.O. i e menor di edat J.W. Segun fiskal Smits nan ta kulpabel di komplisidat den e homisidio. Ministerio Públiko su ponensia ta, ku ta J.W. a lòs e tiru fatal. Na momento di e tiroteo e tabatin 15 aña di edat – meskos ku Domacassé. Ministerio Públiko a pidi un aña di detenshon hubenil i un medida di PIJ (Plaatsing in een Inrichting voor Jeugdigen, Kolokashon den un Instituto pa Hóbennan) di 2 aña. E kastigu pidí kontra dje ta basá riba derecho penal hubenil. Kontra G.O., entretantu di 19 aña, Ministerio Públiko a pidi 24 aña di prizòn. Kontra e otro sospechosonan a pidi kastigunan ku ta varia, dependiendo di e echonan di kua ta sospechá nan, segun Ministerio Públiko.
E mensahe di e fiskal
Pa Smits ‘Galápagos’ ta mas ku un kaso penal kontra dies sospechoso. E ta mira e kaso komo un momento den kua Boneiru mester para ketu na e pregunta di na unda e isla ta bayendo. Segun e fiskal, e veredikto di korte por ta parsialmente determinante pa e futuro di Boneiru. Esaki lo bira e fin di un periodo sumamente violento ku violensia fatal di arma di kandela? Òf poko-poko e isla lo sigui hundi bai den un situashon den kua kada bes di nobo un víktima fatal ta kai den un tiroteo? E palabranan ei ta pone un peso indiskutibel riba e desishon ku hues Eline Groenendaal mester tuma akiratu.
Pero un korte no ta kondená solamente a base di temor sosial. Korte mester evaluá e prueba pa kada sospechoso, i e prueba ei ta kompliká. Imagen di kámara por mustra e kaos, pero no kada bala. Tin biaha por investigá hùls, pero no ora hopi arma a disparsé. Datonan di telefòn por rekonstruí moveshon, pero nan no ta proba outomátikamente ken a tira. Ei e esensia di ‘Galápagos’ ta sinta.
Un anochi, 56 tiru. Un mucha hòmber di diessinku aña morto. Despues, segun Ministerio Públiko, un akshon di vengansa den direkshon di Nort di Saliña. Awor e preguntanan ku finalmente ta korte so por kontestá: ken a hasi kiko, i ken por tene penalmente responsabel pa esei?
Djaluna 30 di ougùstùs i djamars 31 di ougùstùs abogadonan defensor a haña e oportunidat pa, na nòmber di nan klientenan, reakshoná riba e akusashonnan i e demandanan di kastigu di Ministerio Públiko. Despues ta keda na korte. Riba 27 di òktober lo dikta sentensia por eskrito den e kaso ‘Galápagos’.
