WILLEMSTAD – Na mucha Aichel Thomson su mayornan a maltrat’é i na skol nan tabata tent’é pasobra hopi bia e ta sinta den klas ku su kurpa tur bati ku mancha blou. Aktualmente e ta usa su relato pa motivá hóben ku ta den e mésun situashon.
Thomson ta tene su relato na skolnan i ta duna e alumnonan workshop. Segun Viandrelica Narcisio di Kuido Hudisial Ambulante di Hóben (AJJC, Ambulante Justitiële Jeugdzorg Curaçao), un fundashon ku Thompson ta koperá kuné, hopi edukadó no sa ki efekto violensia tin riba mucha. “Serka hende ku ta aktivo den violensia ta violensia den famia ta e di mas importante.”
Narcisio a kompará e sifranan di hóben envolví den insidente ku violensia na skol i riba kaya entre 2014 i 2018. Ta sali ku e hóbennan aki ku ta kometé krímen violente ta bira mas i mas hóben. “Nos ta mira un patronchi kaminda violensia kontra di mucha ta hunga un papel grandi”, Narcisio ta konta.
Archell Thompson ta konta alumnonan su historia
Ku Thompson tambe e kos a bai malu. Den su mes palabranan e ta lanta komo un mucha hòmber insigur ku semper ta buska atenshon. E ta kai den kriminalidat. Ku 21 aña e ta bai Hulanda. Ei e ta logra di kambia su bida.
‘Mucha tin derecho’
“Mucha mester sa ku vulnerabilidat tambe ta forsa. Ku nan por mas ku nan ta pensa òf ku un otro hende ta pensa di nan. Na mester sa ku mucha tin derecho i ku nos komo adulto tin deber”, Thompson ta bisa. Tin ousiliante presente na su workshopnan, pa despues duna akohida na e muchanan.
Fundashon Yuda Muchanan di Skol di Kòrsou a manda buska Thompson pa bini Kòrsou. For di 2017 nan ta kolektá artíkulo usá for di Hulanda, ku a regalá na Skol, Fundashon i Asosiashon lokal. “Nos ke duna mas atenshon na e alumnonan di enseñansa sekundario (VO). Nos ta konsiente ku tin hopi ta sosodé bou di hóbennan, p’esei nos a hasi e paso aki tambe den banda”, Denice Bezemer-Hoyer, kofundadó di e fundashon ta bisa.
Narcisio a skibi un plan di kampaña kaminda skolnan, hustisia, kadenanan di ousiliante i di gobièrnu ta koperá pa trata e violensia den famia. “Mayoria di nos a lanta den famia kaminda violensia tabata normal. Hopi hende ainda ta pensa ku un klap pedagógiko ta un manera normal pa eduká. Nan no ta konsiente di e posibel konsekuenshanan.”, segun Narcisio.
Atrakadó armá ta bira mas i mas hóben
Sifranan ta mustra ku e mayoria di atrako ta kometé pa mucha hòmber masha hóben. Hopi bia nan ta bini di famia ‘multiproblemátiko’ i te ainda no ta señalá e hóbennan di riesgo sufisientemente.
Ministerio di Enseñansa (OWCS) aktualmente ta trahando riba un plan di seguridat pa skolnan pa por yuda hóbennan ku ta kore riesgo mas lihé. “Den kuadro di oumento di seguridat na skolnan mi ta trahando riba un trayekto pa reforsá sosten sosial i sikológiko”, minister di Enseñansa Marilyn Alcalá-Walle ta bisa.
“Seguridat físiko ta un aspekto, pero seguridat sosial ta bira mas i mas importante”, segun e minister.
