KRALENDIJK – Ainda no ta konosí si tin kontaminashon ku e viro corona, pero gobièrnu a tuma medida pa tene e viro for di e isla mas tantu posibel. Esakinan tin konsekuensha tambe pa e ayudo na e isla.
Adra Food Pantry Bonaire, mihó konosí komo banko di kuminda Adra, tur siman ta entregá pakete di kuminda na famia den nesesidat na Boneiru. E tim ta ripará ku tin prekupashon tokante e desaroyonan rònt di e viro corona pero ta garantisá ku e ayudo ta sigui normalmente.
Outor Marit Severijnse. Na Hulandes
Nesesidat di ayudo pa grupo di riesgo
“E pakete di kuminda di Adra ta yuda mi famia mei mei di luna. Mi ta bira emoshonal ora mi pensa riba esaki”, Criselda Mercera ta bisa. “Mi ta penshoná i mi mester paga hür. Mi no ta sobra nada pa mi kumpra vitamina.”
E boneriano tabata bende krokèt seka hòspital pero ku e medidanan nobo esaki no por mas. Mersera ta usa remedi kontra preshon haltu i ta kai bou di e grupo di riesgo di corona. E ta haña ku gobièrnu mester sòru pa siudadano vulnerabel, por ehèmpel hende grandi di edat ku tin ku biba solamente di un kompensashon di AOV.
Gobièrnu mester duna vitamina i produkto di desinfekshon na hende grandi di edat. Fruta i bèrdura fresku ta muchu karu na Boneiru. Hende grandi di edat manera ami no tin sèn pa kumpra esaki”, Criselda ta konta.
Banko di kuminda por entregá na kas
Segun Edward Sedney, kordinadó seka Adra, su klientenan no tin nodi di ta prekupá: “Hende ta konta ku nos. P’esei nos ta tuma medida pa evitá un eventual viro di corona,”Semper tin un chèns ku nos mester sera porta. Komo medida preventivo. Pero den e kaso ei nos lo entregá e paketenan di kuminda na kas seka e klientenan.”
E ta ripará ku ta surgi skarsedat di sierto produkto manera arña di funchi i aros, pasobra tin hende a bai ‘hamster’ (kumpra montoná warda) ‘pa siguridat’. “Nos tin un stòk di reserva firme. I tin importadó ku ta usa un pallet di produkto espesialmente pa banko di kuminda Adra.”
Medida di higiena mas estrikto
Mésora ku gobièrnu a anunsiá medida mas estrikto e trahadónan di Adra Food Pantry a kuminsa traha. Nan a tuma medida èkstra di higiena manera keda ripití desinfekshon di tonbank i mesa. Tambe ta atmití solamente dies kliente pareu.
“Nos ta usa Glacial pa desinfektá nos mannan pasobra no tin djèl”, e ta bisa ku un sonrisa sin humor.
Sedney ta garantisa e partimentu di pakete di kuminda: “Nos tin sufisiente trahadó i boluntario ku ta p1erkurá pa e trabounan sigui kore normal.
